Zin chau City chak lo

Thlasik chawlh laiin Dubai-ah Real Madrid leh AC Milan te an inkhel a, club pahnih league result-in a tuar ve ve. Premier League club-te thlasik laiin an rim a, chutichung chuan Manchester City-in sponsor-te tih lawm nan Abu Dhabi-ah German club Hamburg nen friendly match an khel a, inkhel awmze nei lo an chakna hian FA Cup result-ah nghawng lian tak a nei. Inrinni zan inkhelah Manchester City hian an khelmual Etihad Stadium-ah Championship club Middlesbrough lakah 2-0 in an tlawm a, FA Cup aṭangin an tla.

First half-ah khelmual neitu Manchester City an khel ṭha zawk a, amaherawhchu Championship club zinga defensive record nei ṭha ber Middles­brough an ṭang tluan thei hram. Manuel Pellegrini-a'n Real Madrid a enkawl laia squad-a tel ve keeper Tomas Mejias-a'n first half-ah ṭum rukin ṭha tak takin a dang. Boro keeper hian Aleksandar Kolarov, Stevan Jovetic, James Milner leh David Silva te goal khung tur a dan leh Dedryck Boyota hlah ho zarah minute 45 chhungin goal a lut lo.

Second half-ah City midfielder Fernando-a'n a back pass sual hnuah a tihsual siam ṭhatna hun a nei a, mah se Boro forward Patrick Bamford a pet per avangin goal hmasa bera an chhuah. Boro tana goal khungtu Bamford hi Chelsea aṭanga loan-a khel mek a ni. Mikhual team goal bawh a na chhunzawm a, City tlar hnung a mumal loh avangin Boro tan Lee Tomlin, Grant Leadbitter leh Albert Adomah te'n goal khung theihna turah an hlah. Substitute Frank Lampard Lampard pawhin City a chhanhim zo lo a, 1-0 a nih laiin Chelsea player hlui hian goal ban a pet per. Chance ngah zawk leh chak phu zawk Boro a tawpah an ding chang a, injury time-ah substitute Kike-a'n goal a khung leh a, 2-0 in inkhel a tawp.

Eng nge an sawi?

Manchester City manager Manuel Pellegrini chuan, "Goal an khung hma khan chance ṭha ṭum ruk vel lai kan nei a, kan khung lo vek. Ho takin kan lamah a lut a, kha kha inkhel ti danglamtu chu a ni. Kan chak loh chhan hi Abu Dhabi-a ka zin vang a ni lo, chak loh vanga chhuanlam siam ka tum lo," tiin a sawi.

City boss Pellegrini chuan sawi chhunzawmin, "Inelna zawng zawnga tel hi chu ka duh a, amaherawhchu tunah chuan Premier League leh Champions League-ah chauh kan insawr bing tawh ang," tiin a sawi.

Middlesbrough manager Aitor Karanka chuan, "City khan first half-ah chance an ngah a, player an neih ṭhat avangin ka hlauthawng a ni. Halftime-ah player-te ka fuih a, first half-a kan tihsual ang kha kan tisual nawn tawh lo. City kan hneh theih chhan hi player-te, supporter-te leh club chhunga hnathawkte zawng zawng thawhrah a ni," tiin a sawi.