Palace lakah Southampton an tlawm

Alan Pardew kaihruaihna hnuaiah Crystal Palace-in FA Cup fifth round an lut. Palace hian Southampton 3-2 a hneh turin ṭum hnih an si phurh an sut a, chakna goal khungtu Marouane Chamakh-a'n vawi hnih a pet goal.

Southampton hian an khelmual­ah Graziano Pelle hmangin minute 9-na lekah hma an hruai a, minute thum hnuah Palace-in Marouane Chamakh goal hmangin an sut nghal. Minute 16-naah Palace defender Scott Dann-a'n an lamah a tilut a, minute 21-naah Yaya Sanogo-a'n Palace tana a goal hmasa ber a khung a, French forward hi January transfer-a Arsenal aṭanga loan hmanga an lak an ni.

Team pahnih an inhnehtawk hnuah Saints tlar hnung a pherh chhunzawm a, minute 39-ah Chamakh-a'n chakna goal a khung a, goal dang a lut tawh lo.

Southampton boss Ronald Koeman chuan, "Crystal Palace khan ṭum dang aiin an khel ṭha a ni. Second half-ah insiamṭha mah ila goal kan khung thei lo," a ti.

Crystal Palace boss Pardew chuan, "Chanchinbu ka chhiar a, FA Cup kan champion theihna chance chu 0.02% a nih thu ka hmu a. Saints kan hneh takah chuan kan champion theihna chance chu a sang sawt ang," tiin a sawi.

Saints hian FA Cup-ah record an nei ṭha lo a, an match hnuhnung 24-ah vawi 17 an chak lo a, vawi thum chiah an chak. Hetihlai hian Pardew hnuaia game liah Palace hi an la hak fai vek.