Kan chak lo hi club mualphona a ni - Mourinho

Inrinni zan khan Chelsea-in League One club Bradford City an hneh lo a, inkhelh banah Jose Mourinho-a'n an club tenau zawk an hneh loh avanga an mualpho thu a sawi.

Chelsea starting eleven hi pound maktaduai 200 man an ni a, substitute player man zat hi pound maktaduai 99 a la ni cheu bawk. Bradford City-ah erawh man nei awmchhun James Hanson pawh £7,500 man lek a ni.

Stamford Bridge-ah Chelsea-in Gary Cahill leh Ramirez te goal hmangin 2-0 in hma an hruai a, minute 38-naa goal hnihna a luh chiah hian Premier League hmahruaitu hi chak chiang tura ngaih an ni.

London-ah thilmak a thleng a, minute 41-naa Jon Stead-a'n yard 18 aṭangin kawh zetin a pet goal. Stead-a goal hi player-te chak beiseina neih tirtu a ni a, an supporter 6000 te thawm ṭha chu player-te phurna petu a ni bawk.

Minute 75-naah Filipe Morais-a'n goal khung lehin Bradford-in an siphurh an sut a, minute sarih hnuah Andy Halliday-a'n hmahruaina goal a khung zui a. Hun tawp hma hretin Mark Yeates-a'n goal lina a khung leh a, Bradford 4-2 in an chak.

Chelsea leh Bradford inkarah hian club 49 an awm a, Bantams (Bradford kohna) hian kum 18 chhunga a vawi khatna atan FA Cup fifth round an lut. Chelsea hi an chak loh avangin cup pali an chawi thei dawn tawh lo a, season 17 chhunga fifth round an thlen loh ṭum hnihna a ni bawk.

Eng nge an sawi?

Chelsea boss Jose Mourinho chuan, "Club te laka club lian kan tlawm hi mualphona ni. Tuna kan result avang hian kei leh ka player-te kan zak tur a ni. Kan hrilhai tih chu a dik tawk lo, kan zak tak meuh meuh a ni," tiin a sawi.

Bradford boss Phil Parkinson chuan, "2-0 a nih kha chuan hun tawpah goal engzatnge kan phurh ang tih ka ngaihtuah a. Goal hnih chhuah hnua kan lehthal theih avangin ka player-te kan chhuang takzet a ni. Kan supporter-te kha fak tel bawk, ring takin thawm zai a, kan khelmuala khel ang mai kan ni,"tiin a sawi.

Bradford boss chuan inkhel ṭan hmain chak ngei a duh avangin Chelsea manager Mourinho a chibai duh loh thu a sawi tel bawk.