Ronaldo hnawh chhuah zanah Real an vannei Barca leh Atletico-in Real an ûm zel
Football-ah hian champion tur chuan 'vanneih a ngai' tih hi sawi a ni fo a, Inrinnia Real Madrid-in Cordoba an hneh dan kha chu vanneih a tel chiang mai. He inkhelah hian Cristiano Ronaldo a mualpho a, an khingpui a pet luih avangin an hnawtchhuak a; nimahsela hun tawp dawnah penalty sawi hlawh tak mai an hmuh chu Gareth Bale chuan a thun a, 2-1 in an vannei ta a ni.
Barcelona an kal zel a, Lionel Messi leh Neymar-te chuan goal hnih khungin Elche 6-0 in an sawp a, tun hnaiah a zawnin vawi ruk an chak ta. Atletico Madrid pawh an chak a, Rayo Vallecano chu 3-1 in an hneh a, King's Cup-a Barcelona an hneh loh hnuah an insiam ṭha.
Real leh Ronaldo an buai
Cordoba khelmual Estadio Nuevo Arcangel-ah hian Nabil Ghilas chuan minute thumna lekah penalty aṭangin Real Madrid goal-ah a thun a, hei hi Karim Benzema chuan Minute 27-naah a sût.
Real hi beisei angin an khel ṭha thei lo a, goal chance an insiam thei lo mai ni loin goal zawnah pawh an pet thei lo a ni ber. Na takin an innawr tawn a, mual neitu lam an khel ṭha mah zawk a, Real Madrid goal bar an tihper mai bakah goal hlauhawm an nei nual.
Real thiampuipa Ronaldo chu Cardoba lamin an veng hneh hle a, a thinrimin defender Jose Angel Crespo chu a khawih lui niin a lang a, hei hi referee-in a hmu lo. He mi hnu lawk hian Ronaldo hian Edimar chu ball tel miah loin a pet lui a, an hnawtchhuak a, minute 82-naa an chhuah pahin an khingpui player hi a kutin a khawih zui bawk - Ronaldo hi engtia rei nge an hrem dawn hriat a la ni lo.
Real hian point an hloh ngei dawn niin a lang hman a; nimahsela hun tawp dawn ṭepah Bale-a freekick pet chuan wall-a ding Fede Cartabia kut a fuh a, he player hian a hmai a veng mai niin lang mah se referee-in yellow card a phawrh a, a yellow card vawi hnihna a nih vangin an hnawtchhuak nghal a, penalty a chawi zui - minute 89-naah Bale chuan a pet goal a, 2-1 in Real an chak hram.
Eng nge an sawi?
Inkhelh ban hnuah Ronaldo a inchhir a, a thil tih chu pawi a ti. FIFA Player of The Year chuan, "Ka thiltih zawng zawngah ngaihdam ka dil a, a bikin Edimar chungah ngaihdam ka dil e," a ti.
Real Madrid leh Ronaldo mualpho tur hliahkhuhtu Bale chuan, "Tun hi champion sawina hun a la ni lo. Hmabak a la tam a, inkhelh tur a la tam avangin kan ṭan mar pât a ngai ang. Hetiang inkhel hi a thleng ve fo a, Cristiano pawh a red card hmuh avangin hrehawm a ti a; nimahsela football-ah hi chuan hengte hi a keng tel vek a ni," tiin a sawi.
Carlo Ancelotti chuan, "Hmahruaitu nih dawn chuan point kan mamawh a, harsa mah se point kan hmuh avangin ka lawm khawp mai. Kan che hlei thei lo a, khelh an harsa a, Cordoba kha an khel ṭha takzet a ni," a ti a; Ronaldo chungchang an zawhna chu, "Ka hmu lo a, kan la inbe bawk si lo a, engmah sawi theih ka nei lo," a ti.
Messi leh Barcelona
Barcelona-in chhungkaw buaina an nei anga sawi ni mah se, King's Cup-a an chet fuh hnuah La Liga lamah an che fuh chhunzawm zel a, a zawna vawi ruk an chakna inkhelah Messi leh Neymar-te'n goal hnih ve ve an khung.
Elche hian Barca hi an ngam lo hle mai a, King's Cup-ah an lo hmachhawn tawh bawk a, game thum inkhelah goal 12 an chhuah a, goal an thun ve lo. Barca tan hian Girard Pique leh Pedro-te pawhin goal an khung bawk a, Barca kalkawng ti awlsam zual turin Elche player pakhat hnawhchhuah a ni.
Neymar chuan, "Kan khelh dan leh kan rilru put hmang kan thlak a, hei hi kan inkhelah a lang. Tun anga kan kal zel chuan kan tan chak loh a harsa a ni," a ti hial a; Neymar-a kawppui Messi hian tun hnaia inkhel hnuhnung pangaah goal riat a khung tawh.
Champion lai Atletico leh an star thar Antoine Griezmann an kal zel a, he French player hian Rayo Vallecano lamah goal hnih a thun a, Diego Simone naute hi 3-1 in an chak.