Australian Open Nadal leh Djokovic an chak, Williams unau an la tar lo!

Nadal an la dal theilo

Australian Open ah World No.3 Rafael Nadal a kal zel a, Pathianni khan Quarter final lut turin South African Kevin Anderson chu 7-5 6-1 6-4 in a hneh. Rei tak hliam vanga a chawlh hnua lo kir leh Nadal hian a khel ṭha hle a, tun hi Grand Slam bika Quarter final a luh vawi 28 na a ni.

Seeded 14 na Kevin Anderson hnehtu Nadal hian Quarter final ah seeded no.7 Tomas Berdych a tum ang. Tomas Berdych hian Australian rawlthar kum 19 mi Nick Kyrgios chu 6-2 7-6 (7-3) 6-2 in a hneh a ni.

A nu birthday-ah Djokovic a chak

Inrinni a Rod Laver Arena a inkhelah seeded no 1 Novak Djokovic chuan Fernando Verdasco 7-6 (10-8) 6-3 6-4 in a hneh. Inkhelh zawhah Djokovic chuan, "Vawiin January ni 24 hi ka nu piamcham a ni a, ka nu piancham lawmpuinan Happy Birthday tia min zaisak turin ka duh che u a ni, " tiin mipui a sawm a ni.

Hetih lai hian Australian Open 2014 champion Stan Wawrinka, chuan Jarkko Nieminen 6-4 6-2 6-4 in a hnneh bawk.

Sharapova a kal zel

Australian Open ah Maria Sharapova khing tawk an la awm hrih lo a, Quarter final lut turin World No. 2 Russian nula hian a khingpui Chinese nula Shuai Peng chu awlsam takin 6-3 6-0 in a hneh. Quarter final ah Romanian nula Irina-Camelia Begu 6-1 5-7 5-2 a tlawmtu seeded 7 na Eugenie Bouchard a tum ang.

Williams unau pawh an chak e

Australian Open hmeichhe lama seeded no 1 Serena Williams chuan kum 33 tling tawh mahse ala upa lo tih tilangin Ukraine mi Elina Svitolina chu 4-6 6-2 6-0 in a tlawm. Hetih lai hian a unaunu Venus Williams pawh a chak a, Italy mi Camila Giorgi chu 4-6 7-6 (7-3) 6-1 in a hneh a ni.

World no. 4 leh 2014 Wimbledon champion Petra Kvitova a chak zo lo a, kum 19 mi Madison Keys hmaah 6-4 7-5 in a tlawm. he inkhela hnehna changtu keys chuan Wimbledon champion lai a hneh mai chu mak a ti a, "Ka kut te hi a la khur vek a,. awmdan pawh ka thiamlo, ka hlim em em ringawt mai a ni" a ti a ni.