Serie A-ah Milan an chak lo leh ta

Inrinni zan khan Lazio-in an khelmualah AC Milan 3-1 an hneh a, he result avang hian Milan boss Pippo Inzaghi dinhmun a derthawng hle. Serie A inkhel dangah Cagliari-in Sassuolo 2-1 in an hneh bawk.

Milan-in minute lina lekah Jeremy Menez hmangin hma an hruai a, bul an ṭan ṭhatna hi an chhawr ṭangkai lo. Lazio-in Marco Parolo goal hnih leh Miroslav Klose goal khat hmangin an chhang let a, 3-1 in hnehna an chang. Milan defender Philippe Mexes chu hnawhchhuah a ni a, kum 2015-ah Milan-in chak result an la hmu lo.

Milan boss Inzaghi chuan, "Kan khel ṭha lo a ni. Chutihrualin kan player-te'n theihtawp an chhuah tih kan hmuh hmaih lo. Lazio goal bawhna lutuk kha kan dawl zo lo a ni. Insiamṭhat tur kan ngah a, result ṭha neih vat kan mamawh,"tiin a sawi.

Milan boss chuan sawi chhun­zawmin, "Kan team hian tun aia ṭhain kan khel thei a ni. Tun hnai match liah kan khel ṭha lo a, khami hma kha chuan kan khel ṭha khawp mai. Khatiang game kha kan khel leh thei tih ka hria. Tuna kan chetṭhat lohna chhan pakhat chu kan player engemawzat hi inhiamna aṭanga rawn kir an ni a, an theihna angin an la khel chhuak thei lo a ni," tiin a sawi.

Thawhlehni hian Coppa Italia-ah Lazio leh Milan te hi an inhmachhawn leh dawn a, Inzaghi tan a dinhmun sawh­nghet turin he inkhel hi a pawimawh ang.