MPL 4 ah Luangmual FC

Mizorama football club hlun zinga mi Luangmual FC chu Mizoram Premier League season 4 khel turin an inpet tling leh ta.

Luangmual hian Inrinni zinga Rajiv Gandhi Stadium-a MPL Qualifier-a an khingpui Zotlang FC, Lunglei chu 5-1 in an hneh a, khelh hnih hnuah point ruk an hmu tawh a, game khat khelh tur la nei chungin MPL khel turin an tling der tawh a ni.

MPL Qualifier hi club paliin an khel a, Luangmual FC (6 points), Upper Republic FC (3 points), Zotlang FC (1 point) leh Electric FC (1 point)-te'n vawi hnih ṭheuh an khel tawh. A sang berin MPL4 an khel dawn a, pahnihnain MPL3-a pasarihna Reitlang FC an tum ang - pahnihna tur hi a la hriat loh a, January 28-ah a hriat dawn chauh a ni.

Luangmual nge nge

Luangmual FC hian MPL-a an awm loh chhung pawhin player ṭha tak tak an kawl reng a, MPL-ah an kaipui leh ta. Coach Vanlalrova hoa khel Luangmual hian an khingpuite hi kawng engkimah an hnuaichhiah a ni ber a, chu chu an goal thun zatah a lang.

MPL Qualifier hi January 23-a Lammuala khelh a ni tawh a, khel­mualah harsatna a awm avangin Mualpui lamah Inrinni khan an chhunzawm. Luangmual hian 5-1 in hnehna an chang ta a, Lammuala 1-1 a nih hnuah Mualpuiah 4-0 in Luangmual an chungnung.

Luangmual hian minute 43-naah Lalnunsanga hmangin an thun a, second half-ah Jonathan Lalsang­zuala'n minute 57-naah a thun ve leh. Hemi hnu hian MS Dawngliana'n minute 83-naah goal khungin Lalhlim­puia'n minute 86-naah goal a khung ve leh ta a ni.

Luangmual FC squad-ah hian players tawnhriat ngah, MPL-ah pawh kan hmuh fo ṭhinte leh Mizoram team-ah hial pawh lo khel tawhte an awm fur a, chu chu an chhawr ta a ni.

Champion tum Luangmual

Luangmual FC coach Vanlalrova chuan champion ngei tumin MPL an hmachhawn dawn thu Vanglaini palai zawhna chhangin a sawi.

MPL season hmasa bera Luang­mual FC enkawltu Rova chuan tuna a squad neih chu an ṭhat tawk thu sawiin, "Ka naute hi an fit ṭhat phawt chuan MPL atan pawh hian an ṭha tawk. MPL khel tur zingah hian tumah huphurh bik kan nei lo a, kan châk tawh tak zet a ni," a ti a; Luangmual FC coach chuan player an lak belh tur thu sawiin, champion thei ngei tur team an indin tur thu a sawi.

MPL playoff-ah a naute an khel ṭha a ti a, "Inpuahchahna hun kan nei tlem a, kar khat vel chiah kan inbuatsaih hman a ni. Chuti chung chuan ka naute an khel ṭha a, ka beisei aia ṭha daihin an khel thei a, an fakawm tak zet a ni," a ti.

Vanlalrova chuan Luangmual mipuiin an phurpui thu sawiin, "Anni zarah MPL khel leh turin kan tlin theih phah a ni," tiin, Luangmual mipuite chungah lawmthu a sawi.

MPL-a inpet kaite

Mizoram Premier League ṭan a nih dawn khan MFA hnuaia first division team awmsa - Dinthar FC, FC Kulikawn, Luangmual FC-te chu tlingsaa dah an ni a, 1st MAP leh 3rd MAP football club-te chu hmun khata inchhûng khawmin Mizoram Police FC tiin an indin.

MPL-a tling tur MPL Playoff khelh a ni a, chutah chuan Aizawl FC, Chanmari FC, Reitlang FC leh FC RS Annexe-te an kaisang.

MPL-1 khelh zawh a ni a, FC RS Annexe an tla a, Chanmari West FC chu MPL-2 khel turin an inpêt tling thung a, an kalkawnga inkhel pawimawh takah Khawzawl FC an hneh.

MPL-2 a zo a, FC Kulikawn chu MPL aṭangin an tla a; Lunglei FC chu MPL Playoff-ah che ṭha berin MPL-3 khel turin an inpêt kai. Anni bakah hian Luangmual FC-in hrem an tawh avangin Bethlehem Vengthlang FC chu MPL-3 khel tura kaisantir an ni.

MPL-3 a zo a, Lunglei FC chu season khat MPL-a an khelh hnuah an tla ve lehnghal a, Luangmual FC chu an kaisang zui leh dawn ta a ni. Tunah hian 'MPL Playoff' hmabak a la ni a, chu chu MPL-4 qualifier khelh meka pahnihna leh MPL-3 lama pasarihna Reitlang FC-in an khel ang, vawi hnih inkhelin a belhkhawma a chak zawkin MPL-4 an khel dawn a ni.