Arsenal-ah Paulista?

Spanish club Villarreal thuchhuak chuan Arsenal nen inremna an neih thu an sawi. La Liga club thuchhuakin a tarlan chuan Brazilian defender Gabriel Paulista hian London club a zawm ang a, Joel Campbell-a'n loan hmangin Spanish club a zawm thung dawn a ni.

Club pahnih hi an inrem tawh nachungin Arsenal-in Paulista la lut tur chuan Brazil tana la khel lo defender hian work permit a neih hmasak a ṭul ang.

Kum 24-a upa Paulista hi pound maktaduai 15 man ang vela chhut a ni a, kum 2013 khan Brazilian club Vitoria aṭangin Villareal hi a zawm.

Arsenal aṭanga chhuak tura sawi kum 22-a upa Campbell hian kum 2011 khan Costa Rican club Saprissa aṭangin London club hi a zawm a. Arsene Wenger-a hnuaiah khelhna hmun a chan tam theih loh avangin French club L'Orient, Spanish club Real Betis leh Greek club Olympiacos-ah te loan-in a chhuak tawh a ni.