Santosh Trophy 2015 Mizoram leh team dang pakua
Mizoram chu goal chhuah loin 69th Senior National Football Championship for the Santosh Trophy final round khel turin an tling. India rama football thiam ber state ni nawn turin Mizoramin kalkawng hmasa ber an patlang phawt a, hmabak khirh zawk an hmachhawn leh ang.
Final round khel tur zawnna hi India ram hmun hrang hrangah neih a ni a, champion lai leh a thlengtu tur Goa pawhin qualifier hi an paltlang a ngai.
Team 33 chu zone ngaah ṭhen an ni a, zone tin aṭangin team hnih ṭheuh final round khel turin an tling a. Chung team-te chu Assam, Delhi, Goa, Kerala, Maharashtra, Mizoram, Punjab, Railways, Services leh West Bengal te an ni.
Inelna ṭan hun
Final Round hi ruahman lawk dan chuan Goa-ah February 20 leh March 10, 2015 chhunga khelh tur a ni. Inelna kalhmang hi kum hmasa lam nen a danglam dawn lo a, team 10 te chu group pahnihah panga ve vea ṭhen tur a ni.
Group khata team panga-te chu vawi khat ṭheuh an inkhel kual ang a, a tawpah a sang pahnihin semifinal an lut ang.
Final Round Kalkawng
East Zone : Team pasarihte chu group hnihah ṭhen an ni. Group A-ah West Bengal, Bihar leh Jharkhand an awm. Group B-ah Railways, Orissa, Sikkim leh Chattisgarh te an awm thung. Nikum khan Railways hian Northeast Zone aṭangin final round an thleng a, final-ah Mizoram an hneh lo.
Group A-ah vawi 31 champion tawh West Bengal-in an khingpui Bihar leh Jharkhand an hneh ve ve a, chiang taka tling angin lang mah se an goal difference erawh +2 chauh a ni.
Group B aṭangin Railways an tling. Railways hian Chattisgarh leh Sikkim an sawp hnuah Orissa an hmachhawn a, match hnuhnung berah hian an chak loh chuan tla thei an ni. JRD Tata Sports Complex, Jamshedpur-a group match inkhel pawimawh takah goal a lut lo a, Railways-in point sarih hmu chungin final round an lut.
North Zone : Team pariatte chu group hnihnah ṭhen an ni. Group A-ah Punjab, Uttarakhand, Uttar Pradesh leh Chandigarh an awm a, Group B-ah Delhi, Haryana, Jammu & Kashmir leh Himachal Pradesh te an awm.
Group A-ah nikuma North Zone aṭanga final round khel thei Punjab leh Uttarkhand te an awm kawp a. Punjab-in an match hmasa bera Chandigarh an draw laiin Uttarakhand-in an khingpui Uttar Pradesh an hneh a, North Zone inelna thlengtu Punjab dinhmun a derthawng hman hle.
Amaherawhchu, Punjab an chesual nawn duh tawh lo. Match hnuhnung berah Uttarakhand tan Punjab draw tawk mah se a thlengtu hian Uttarakhand hi 7-0 ngawtin an sawp a, inelna a tawp meuh chuan an tling chiang hle.
Group B-ah Delhi-in bul an ṭan ṭha a, Himachal Pradesh leh Jammu & Kashmir an hneh hnuah an group match hnuhnung berah Haryana an drw a. Goal chhuah loin Delhi hian tling.
Northeast Zone : Railways an tel tak lohah chuan Norteast state-in final round-ah team pahnih an thawh leh thei ta. Group A aṭangin a thlengtu Assam-in an khingpui zawng zawng hneh vekin final round an lut. Assam hian match hnuhnung berah Manipur 2-0 in an hneh a, India rama football state ṭhaa sawi ṭhin Manipur-in kum zawnin Santosh Trophy final round an khel dawn ta lo.
Group B-ah Mizoram kalkawng a harsa hran lo a, Meghalaya leh Tripura te hnehin final round an lut.
South Zone : Kumin hian 2013 champion Services chu South Zone-ah dah an ni a, kum hmasa lama group ṭhen hran ngai lo South Zone pawh group hnihah ṭhen hran a ngai ta a ni.
Group A-ah Kerala-in harsatna an nei lo. An khingpui Karnataka leh Andhra Pradesh te sawp ve vein final round an lut.
Group B-ah Services, Tamilnadu leh Pondicherry te an awm a. Group match hnuhnung berah Pondicherry hneh ve vetu Serives leh Tamilnadu-te pahnihah final round khel tur an zawng a, goal difference nei ṭha zawk Tamilnadu tan draw a tawk.
Mizo tlangval Ramniengmawia khelhna Services-in goal an khung hmasa zawk a, Tamilnadu-in an siphurh sut leh mah se vawi thum champion tawh Services-in goal hnih dang khung belhin 3-1 in an chak ta a ni.
Services an tling a, tun hnaia Santosh Trophy final round-a result ṭha tak nei ṭhin Tamilnadu chu team 10 zingah an tel ve dawn ta lo.
West Zone : Team panga chiah an awm avangin group hniha ṭhen an ni ve lo. Goa, Maharashtra, Gujarat, Madhya Pradesh leh Daman & Diu te awmna West Zone aṭangin nikum lam ang bawkin Maharashtra leh Goa an tling a, an pahnih inkara chak zawk Goa chu Zone hmahruaitu an ni.