Juan Roman Riquelme a chawl ta
Ṭum li zet Argentine Footballer of the Year ni thei, Juan Roman Riquelme chuan football a chawlhsan thu a puang.
Boca Juniors player ropui hi Europe-ah Villarreal leh Barcelona-ah pawh a khel tawh a, Argentina tan vawi 51 khelin goal 17 a khung.
Tunlai football-in a tlakchham tak 'playmaker' dik tak a ni a, ball pass thiam leh hmun âwl (space) zawng hmu thiam hmingthang tak a ni a, freekick a pet thiam hle bawk. June 24, 1978-a piang footballer hi kum 2001 khan South American Footballer of the Year-ah thlan a lo ni tawh.
Riquelme chuan, "Ka chawlh a hun tawh a, tunah chuan football fan mai ka ni dawn ta... khelmuala ka hun hman danah ka lungawi a, nupui fanaute nen chawlh hun hlimawm tak kan hmang thei tawh ang. Ka football nun a tawp ta a, nun thar ka hmang dawn ta a ni," a ti.
Boca Juniors-a a khelh chhungin ṭum nga ngawt league champion an ni a, Copa Libertadores-ah vawi thum an champion bawk a; player pawimawh leh an innghahna a ni deuh zel.