Satpal-a'n Padma Bhushan chawimawina a dawng

Wrestler hlui Satpal Singh chu kum 2015-a infiammite zinga Padma Bhushan chawimawina dawng awm chhun a ni.

Saba Anjum, Mithali Raj, PV Sindhu, Sardara Singh leh Arunima Sinha te'n Padma Shri chawimawina an dawng ve bawk.

Republic Day apiangin India khua leh tui mahni hnathawhna kawnga hming ṭhate hnenah chawimawina pek ṭhin a ni. Civil mite hnena chawimawina dawn theih sang ber chu Bharat Ratna a ni a, a dawttu chu Padma Vibhushan a ni.

Kum 2015 hian infiamite zingah chawimawina sang pahnih dawng thei an awm lo. Sachin Tendulkar chuan kum 2013 khan Bharat Ratna a dawng a, infiami zinga he award dawng thei awm chhun a la ni. Kumina infiammite chawimawina dawn Padma Bhushan leh Padma Shri hi civil mite chawimawina dawn theih zinga sang ber pathumna leh palina a ni.

Tunge Satpal?

Satpal Singh hi February 1, 1955 khan Delhi-a thingtlang khaw pakhat Bawana-ah a piang a, wrestling coach lar Guru Hanuman hnuaia inzir chhuak a ni.

Guru Satpal tia hriat lar Delhi wrestler hian Common­wealth Games-ah ṭum thum silver medal a dawng a, Asian Games-ah Gold leh Silver medal a dawng tawh bawk. A hunlai hian India ram bikah chuan amah el pha an awm lo a, national heavyweight champion ṭum 16 ni thei a ni.

Kum 59-a upa Satpal hi tunah chuan wrestler a nihna ai mahin Suhsil Kumar-a coach a nihna angin hriat a hlawh tawh zawk. Saptal-a enkawlna hnuaiah Sushil hian Olympic medal ṭum hnih a dawng.

Satpal hian Padma Bhushan chawimawina a dawn hma hian Arjun Award (1974), Padma Shri (1983) leh Dronacharya Award (2009) te a lo dawng tawh a ni.

Padma Shri dawngtute chu

Saba Anjum Karim hi June 12, 1985 khan Bhopal-ah a piang a, amah hi hockey player a ni. Kum 29-a upa Anjum hian kum 2000 aṭangin India hockey hmeichhe team-ah a tel ṭan a, 2002 Commonwealth Games khan inelna tel zinga naupang ber a ni. India team tan inelna hrang hrang a khel tawh a, Commonwealth Games 2012 leh Asia Cup 2004 khan India chu gold medal a lak pui a, Asian Games 2006 khan Bronze a lak pui bawk. Anjum hian kum 2013 khan Arjuna Award a dawng tawh a, ram tana vawi 200 a khelh tawhah goal 92 a khung tawh a ni.

Mithali Raj hi India hmeichhe cricket player a ni a, amah hi all rounder a ni. December 3, 1982 khan Rajasthan-ah a piang a, kum 10 a nih aṭangin cricket a khel ṭan a, kum 17 a nihin ram tan a khel ṭan der tawh. 2013 Women's World Cup khan Mithali hi ODI ranking bikah pakhatna a ni.

Pusarla Venkata Sindhu hi India hmeichhe badminton player a ni a, kum 19 leka upa a ni. PV Sidhu hi Pullela Gopichand hnuaia inzir a ni a, kum 2014 khan FICCI Breakthrough Sportsperson of the Year leh NDTV Indian of the Year a thlan a ni bawk.

Sardara Singh hi hockey player a ni a, Hockey India League hmasa berah khan marquee player zingah a hlawh tam ber a ni. A captain-na hnuaia khel Delhi Waveriders chu pahnihna a nih pui a, 'Player of the Tournament' a thlan a ni. Kum 28-a upa Sardara hi India tan vawi 191 a inlan tawh a; Commonwealth Games, Asia Cup leh Asian Games-ah India hockey team gold medal a lo lakpui tawh a ni.

Arunima Sinha hi kum 1988 khan Uttar Pradesh-ah a piang a, national level volleyball player a ni. Kum 2011 khan train-ah rukru lakah a chesual a, hei vang hian a ke veilam an tan.

Kum 2013 khan khawvela tlang sang ber Mount Everest a lawn chhuak a, hmeichhe ke bul (amputee) Mount Everest lawn chhuak thei hmasa ber a ni.