MSL Playoff kan nghak chhuak ta
Mizoram Super League Playoff chu vawiin hian khelh ṭan a ni dawn.
Mizoram basketball a inelna sang ber MSL khel phak tumin team pangain Zarkawt Recreation Centre-ah hmu ruak pakhat an inchuh ang.
Chawhnu dar 1:00-ah Hollow BBSP leh Tuikual South te'n an khel ang a, tlai dar 3:00-ah KK Basketball Club leh Bethlehem BC-te'n an chhunzawm ve leh ang.
Tuikual South fiahna!
MSL playoff match hmasa bera intum turte hi an inang lo hle. Hollow BBSP hi kum 2009 khan ṭhian hoin an din a, player-te hi higher secondary zirlai-te an ni nawk hlawm. Hun rei tak lo khelho tawh an nihna hi an inchhuanna chu a ni.
An khingpui Tuikual South hi mipui rinkai zawk an ni. Local council leh veng chhung NGO hrang hrangte'n an phurpui a, Delhi aṭangin India junior team tana khel tawh Ravi Kant leh Rakesh-te an la lut hial - an ti mai mai lo. MSL khelh ngei tumin sum leh pai an seng nasa a, vawiinah Tuikual South fiahin an awm ang.
Eng nge an sawi?
Tuikual South captain F. Zodinthara chuan, "Kan huphurh hran lo a, inkhelh hi kan chak tawh a ni. Game a ni a, kan dinhmun tur chu sawi lawk theih a ni lo nachungin kan chak ngei kan inring a ni," a ti. Mizoram tana vawi tam tak fehchhuak tawh Dina hian Vanglaini palai hnenah veng chhung mipui an phur tawh thu leh an inkhelh huna an ṭawiawm ṭhat a rin thu a sawi tel bawk.
Hollow asistant coach Jacob Liantluanga chuan, "Kan huphurh hran lo, huphurh nei ila MSL playoff khel turin kan inbuatsaih lo ang. Tuikual South lam hi kei ni ai chuan experience pawh nei ṭha zawk an ni a, mahse game a ni a, chak zawk tur sawi nan chuan a la hma hret a ni, " tiin an zam loh thu a sawi.
Mipui ngaihven Bethlehem
MSL playoff atana player inla nasa ber thlang ta ila - Bethlehem hi sawi hmasak zingah an tel ang.
ARC, Shillong aṭangin Manipur player HSK Tinku Singh te, Kolasib tlangval RL Famkima leh Lalhmachhuana, Ramthar veng te an lak avangin he team tum hi a chakawm loh. Khawtlang an phur a, player an phur a, an inkhel hi mipui hmuh chak a ni.
Bethlehem hmaa ding tur KK basketball Club hi player en mai chuan rinkai lo zawk an ni. Amaherawhchu captain Alex chuan mipui rinkai lohna tak chu an chakna hnar a nih thu a sawi. KK hian state pawn aṭanga player lak an nei lo a, amaherawhchu senior player kaihhruaina hnuaiah an khel dawn a, zuam ngawt chi an ni lo ang.
Eng nge an sawi?
Bethlehem assistant coach K Lalṭhazuala chuan Vanglaini palai zawhna chhangin, "MSL playoff khel ngam chin chu hneh loh theih vek an ni. Keini chuan team tin hi intluk tlang vekin kan en dawn a, dah hniam bik kan nei lo, a ṭha thei ang ber zelin khelh kan tum dawn a ni," a ti.
KK BC captain Alexander Lalrempuia chuan, "Kan zam hran lo, hneh ngei tumin kan khel dawn. Bethlehem hi state pawn aṭang hiala player lalut thei an ni a, mahse, an inkhel kan la hmuh loh avangin an dinhmun tur sawithiam a harsa. Pressure awm loin kan khel anga, kan inhmachhawn hunah a chak zawk chu a hriat ang," tiin a sawi.
Vawiin inkhel tur
01:00PM Hollow BBSP Vs Tuikual South
03:00PM KK BC Vs Bethlehem BC