Real an chak, Atletico an chak lo

Real Madrid-in Inrinni zan khan Sevilla 2-1 in an hneh a, La Liga hmahruaitu lailawk a ni a. Table dinhmun hi nizana Barcelona leh Granada inkhel result a zirin a danglam thei ang.

Inkhel dangah Atletico Madrid chuan khualmualah Eibar 2-0 in an hneh lo a, Diego Simeone hote hi an hnuai chiaha awm Sevilla an chak loh avangin pathumnaah an awm chhunzawm thung.

Real puitu VAR 

Santiago Bernabeu-a first half-a thil thleng langsar ber chu Sevilla tana Luuk de Jong-a tauh luh ṭha zet VAR hmanga an pawm loh a ni a, inkhelh banah Sevilla manager Julen Lopetegui-a'n VAR thu tlukna a pawm loh thu a sawi.

De Jong hian corner aṭanga ball kal chu a tauh lut a, amaherawhchu hun thawl a neih theih nan Sevilla midfielder Nemanja Gudelj chuan Real defender Eder Militao a dan avangin pawm a ni lo.

Lopetegui chuan, "Dan ang thlapin goal kan khungah ka ngai a, an pawm loh chhan kha ka hmuh chian loh avangin ka sawi zui thui thei lo. Tihsual langsar tak a awm avangin kan phu ang result kan hmu loah ka ngai," tiin an goal pawm loh chungchang a sawi.

Real Madrid tlarhma ten goal khung an harsat zanah Casemiro a rawn inlar a, Brazilian midfielder hi defender pahnihin an chep chungin Sevilla keeper cool takin a pet khum. Goal hmahruai hi minute 57-naah a lut a, minute 64-naah Luuk de Jong hmangin Sevilla-in an chhanglet nghal.

Kum 29 mi Luuk de Jong-a'n goal khung tura a insiam danah striker ṭha a ni tih a pholang. Chutihrualin Munir El Haddadi-a'n a kutin ball a khawih fuh nia a lan avangin VAR hmanga ennawn a ni a, Sevilla midfielder kiuah ball-in a per chungin goal hi an pawm.

Real Madrid an talbuai phah lo a, minute 69-naah Lucas Vazquez-a'n ding lam aṭanga ball cross ṭha zet chu Casemiro-a'n chiang zetin a tauh lut. Goal dang lut tawh loin Real Madrid 2-1 in an chak.

Sevilla sporting director Monchi chuan, "Ril taka inkhel thlirlet ka tum lo, a chhan chu kan goal khung an pawm loh kha inkhel result thlak danglam thei a ni. De Jong-a goal hnihna kha pawm lo nawn se chuan ka naute khelmual 

aṭangin ka chhuahtir hial ang," tiin VAR thutluknaah a lawm lo hle.

Real Madrid manager Zinedine Zidane chuan, "VAR hmangin an en let a, foul an hmuh avangin an pawm loh maiah ka ngai. Second half-ah khan handball a awm ngeiin ka hria a, an pe lo. Referee hna hi a hautak a, a chang chuan kan duh zawnga thlutukna siam hun leh duh loh zawnga thutlukna siam hun a awm," tiin a sawi.

Sevilla nena an inkhelh ṭum hian Gareth Bale leh James Rodriguez te an inlan lo a, Zidane chuan, "An inhliam avangin training an zawm thei lo," tiin thil awm dan a sawifiah.