Barakhaih pumpelhtu Arsenal

FA Cup champion lai Arsenal-in Championship club Brighton & Hove Albion 3-2 in an hneh a, Pathianni zanah result mak a thleng nawn lo - Premier League club Aston Villa leh West Ham-te'n an khingpui Bournemouth leh Bristol City te an hneh bawk.

Amex Stadium-ah tun hnaia Arsenal tana che ṭha em em Santi Cazorla leh Alexis Sanchez-te aiah Mesut Ozil leh Theo Walcott te an lut a, Gunner boss Arsene Wenger-a'n a tifuh.

Inkhelh ṭan aṭanga second 89-na lekah ding lam aṭanga Calum Chambers-a ball siam chu Walcott-a'n goal-ah a chantir a, thla kua zet inhliam vanga a chawlh hnua English forward goal khung vawi khatna a ni.

German midfielder Ozil-a'n minute 24-naah Brighton keeper David Stockdale dan hman loin a pet lut a, first half-ah 2-0 a ni.

Goal hnihna hmahruai hi a la him lo tih Chelsea-in Inrinni zanah Bradford lakah an lantir tawh a. Minute 50-naah Chris O'Grady-a'n goal hmangin Brighton beiseina a rawn siam a, Arsenal an him lo. Amaherawhchu Wenger-a hote talbuai hmain Tomas Rosicky-a'n French forward Olivier Giroud nena wall pass an neih hnuah a pet lut a, minute 59-naa goal dinhmun chu 3-1 a ni.

Minute 75-naah Sam Baldock-a'n mualneitu lam tan goal a khung a, hei hi hun tawp thlenga inkhel tihmuhnawmtu a ni. Brighton hian clear chance tak chu an nei lo chungin Arsenal hi replay khel thei dinhmunah an ding hman - hun tawpah Arsenal 3-2 in an chak.

Eng nge an sawi?

Brighton manager Chris Hughton chuan, "First half-a goal hnih kan chhuah avang khan kan dinhmun a awlsam lo. Theihtawp chhuah mah ila team ṭha laka kan tisual kha a pawi a, kan duh loh ang zawngin referee-in thutlukna a siam bawk. Referee chuan khatiang hunah khan penalty an pe fo a, kan vanduai ṭum a ni," tiin Arsenal defender Chambers-a handball vanga penalty an hmuh loh a ui thu a sawi lang.

Arsenal manager Arsene Wenger chuan, "Cup inchuhna a ni a, kan khingpuite an tlawm duh loh avangin a tawp thlengin theihtawp chhuah a ngai. Inkhelh ṭan aṭangin kan chak ka ring a, Inrinni zan inkhel result avang khan a tir aṭang phatin kan ṭan nghal phah a ni," tiin a sawi.

Aresenal boss chuan inkhelh hmabak sawiin, "Premier League club ṭha zingah fourth round paltlang lo an awm nual avangin champion rinkai zinga mi an ni. Kan champion ngei ang erawh ka ti ngam lo," tiin a sawi.

Inkhel dang

Villa Park-ah Aston Villa-in Carles Gil leh Andreas Weimann-te goal hmangin Championship hmahruaitu Bournemouth an hneh. Bournemouth substitute Callum Wilson chuan hun tawp hma hretin goal khat a khung a, Premier League club hi 2-1 in an chak.

Aston Villa manager Paul Lambert chuan, "Kan chak hi team pumpui thawhrah a ni a, chak kan phuin ka hria. Gil-a goal kha ṭek (lightning) ang maiin a rang a, world class goal a ni," tiin a sawi.

Briston City khelmual Ashton Gate-ah West Ham an talbuai hman hle a; League one club hian inkhel thunun zawk mah se West Ham-in minute 81-naa Diafra Sakho goal hmangin hnehna an chang.

West Ham boss Sam Allardyce chuan, "Khelh an harsa dawn tih kan hria a, kan rin ang chiah a ni. An khelhna league-a pahnihna an nih chhan a chiangin ka hria, chutihrualin kan duh ang result kan hlawh chhuak a, kan lawm hle a ni," a ti.