Aizawl FC-in champion an lawm

Aizawl FC chuan Mizoram Premier Leaa­gue-a an champion chu nimin khan North Lung­lengah ruai nen an lawm a, Aizawl FC Acade­my building sakna tur lung­phum an phum nghal.

Aizawl FC hian MPL-a an champion an lawm bakah ADFA hnuaia first division inelnaa Aizawl FC Academy-te champion an lawm tel nghal a; Lungleng khaw mipuite bakah Aizawl leh a chhehvel aṭangin club mi pawimawh, sawm bikte leh fans an kal khawm a ni.

Aizawl FC hian foot­ball-ah thui tak kal tumin Lunglengah hian football academy changtlung tak din an tum a, nimin khan KS Thanga, Bialtu MLA leh Aizawl FC president hlui ni bawk chuan academy building sakna tur lungphum a phum a; Lungleng khawtlang chuan an khelmual chu Aizawl FC-te'n an duh anga an hman turin an hlan a, Aizawl FC Playground tia vuahin khelmual ṭha zawkah an chei dawn a ni.

Aizawl FC president Robert Romawia Royte chuan Lunglengah inbun ngheh an tum thu leh football-a hmasawn zel tura ṭan lâk an tum dante an sawi a; he huna khuallian KS Thanga chuan a bial chhunga Aizawl FC an inkhuar tur lawmawm a tih thu a sawi rualin Aizawl FC an din tirha an hmathlirte a taka tihhlawhtlin a ni chho zel chu lawmawm a tih thu a sawi bawk a ni.