Australian Open Quarter Final-ah Murray leh Australian Kyrgios intum dawn

Australian Open pawh a ngaihnawm zel a, rinlawk ang ngeiin Andy Murray chuan hnehna changin Quarter final a lut. Quarter final-a Australian mipui ṭan rawn Nick Kyrgios nen an intum tur hi mipui ngaihven a ni.

Nimin tlaiah champion tura rinkai ber Novak Djokovic a chak a, world No. 1 hian Gilles Muller chu 6-4, 7-5, 7-5 in a hneh.

Kei Nishikori chuan awlsam takin David Ferrer a hneh a, 6-3 6-3 6-3 in a chak a, quarter final a lut. Tun hnaia ṭhang duang tak Japanese player chuan, "Set nga inkhel turin ka inpuahchah a, set thum chhunga ka chak thei hi ka lawm khawp mai," a ti.

Andy Murray a kal tluang zel

British mipui ṭan rawn Andy Murray a kal zel a, Quarter final a lut ta. Murray hian seeded 10-na Grigor Dimitrov chu 6-4, 6-7 (5-7), 6-3, 7-5 in Rod Laver Arena ah Pathianni khan a hneh a ni.

A vawi 16-na atana Grand slam quarter final lut Murray hi awlsam takin a chak bik mai lo a, Bulgarian mi Dimitrov hneh tur hian darkar thum leh a chanve lai hun a mamawh a ni.

Kyrgios a chak, a nungchangin dem a hlawh

Australian rawlthar kum 19 mi Nick Kyrgios chuan Roger Federer hnehtu Andreas Seppi chu 5-7, 4-6, 6-3, 7-6 (7-5), 8-6 in a tlawm.

He inkhelah hian chak zawk mah se Kyrgios hian dem a hlawh hle a, dem a hlawh chhan hi fans leh ball boy-te ṭawngkam mawi lo taka a ṭawng khum vang a ni a, a racquet pawh a vawm chhe nual a ni. Kyrgios hi a nungchang mawi loh vangin dollar 4926 chawi tir a ni nghe nghe.

Lleyton Hewitt hnua Australian mipa zinga Australian Open quarter final thleng leh thei hmasa ber Kyrgios chuan, "Ka chak a ni tih ka hriat khan mak ka ti takzet a, ka la hlim ber ṭum a ni hial awm e, " tiin a hlimzia a sawi.

Nick Kyrgios hi kum 1990 a Andrei Cherkasov-a'n Australian Open quarter final a luh hnua kum 20 hnuailam mi Australian Open Quarter final lut thei hmasa ber a ni bawk.

Australian player dang Bernard Tomic erawh a chak zo lo a, Margaret Court Arena a inkhelah Tomas Berdych hmaah 6-2 7-6 (7-3) 6-2 in a tlawm a ni.

Natna ngam loh

Venus William 'Sjogren' natna (zawi leh chauh ngawih ngawihna thlen thei natna) in Venus Williams a hneh zo lo a, kum 2010 hnua Grand Slam quarter final a luh lehna hmasa ber tawngin Venus William chuan 6-3 2-6 6-1 in seeded 6 Agnieszka Radwanska a hneh.

Venus chuan hnehna a chan chhan sawiin, "Ka laizawn Serena min puihna vangin hetiang hian ka lo kir leh thei a ni. Ka fan-te'n ka hun tawn harsat lai ber pawha min phatsan loh vangin vawiinah hian hnehna ka chang a ni, " a ti a; a nau Serena Williams a chak chho zel a nih chuan an unau hian semi-final ah an intum thei dawn a ni.