Ruahsur vangin inkhel titawp

Thawhṭanni khan ruahsur vangin India leh Australia ODI inkhel chu tihtawp a ni. Australia-a criket tri-series neih mekah hneh la nei lo India-in final lut turin Zirtawpniah England an hneh ngei ngei a ṭul ang.

Sydney-a inkhelah hian Austrailia chu toss-ah vannei zawkin, vawm hmasak an thlang. Tun hnaia chefuh thei lo Shikhar Dhawan a la che ṭha chuang lo a, India opener hian run riat chiah siamin field a chhuahsan. Ambati Rayudu chuan run 23 a siam hnuah a ball vuak chu David Warner-a'n a mansak a, bowler chu Mitchell Marsh a ni.

Over 16-naah ruahsur vangin inkhel tihtawp a ni a, India hian wicket hnih hloh hmanin run 69 an siam.

Australia hian league stage an khel zo tawh a, an khingpuite hneh vekin final an lut tawh.