league Cup Stamford Bridge-ah Liverpool an parvul zo ang em?

Bradford City laka an mualpho hnu lawkah Chelsea chuan zanin dar 1:15 hian an khelmual Stamford Bridge-ah Liverpool an mikhual dawn. League Cup (Capital One Cup) semifinal second leg hi Ten Action-a live tur a ni.

Kar hmasa Thawhlehni khan Anfield-ah semifinal first leg khelh a ni a, 1-1 in an inhnehtawk.

FA Cup aṭanga an tlak zawhah Chelsea boss Jose Mourinho chuan, "Kei leh ka player-te hi zak ngawi ngawih tur kan ni," tiin League one club Bradford an hneh loh chungchang a sawi. Zanina an insiam ṭha thei a ni chuan an chak lohna avanga an lungaihna hi a ziaawm ang.

Liverpool an chefuh bik lo, Anfield-ah Bolton Wanderers nen an inhnehtawk avangin chapo thei an ni lo. Chutihrualin Liverpool hi first leg-a cheṭ ha zawk an ni a, goal hmaa vanduai vang chauha chak zo ta lo an ni.

Gerrard-a tan

Liverpool captain Steven Gerrard chuan season tharah MLS club LA Galaxy a zawm dawn a, tun season hi a club hmangaih tana a hun hnuhnung a ni.

Liverpool-in an legend Gerrard-a hi nomawi nen thlah an duh. Champions League aṭangin an tla tawh a, Premier League-ah beisei a sang tawh lo bawk. Capital One Cup-ah nomawi lakna chance an nei

ṭha a, zanin hian Gerrard-a tan an khel ang.

Eng nge an sawi?

Chelsea Boss Mourinho chuan, "Matic, Ivanovic leh Costa-te hi Bradford kan tum ṭuma starting eleven lut lo vek an ni a, heng player-te hian an khel thei ang," tiin player ṭha ṭha luhtir a tum thu a sawi.

Liverpool manager Brendan Rodgers chuan, "Tun hnaia kan khelh dan en chuan Stamford Bridge-ah hian kan chak theih ka ring. League Cup final lut turin Liverpool hian theihna kan nei a ni," a ti. Liverpool hian match hnuhnung 10-ah chak loh an nei lo.

Rodgers chuan Raheem Sterling fakin , "A tlan chakna hian a pui nasa hlein ka hria, a che vel hrim hrim hi a dik em em a, box chhungah defender-te tan buaipuitham a tling," tiin English rawlthar duhawm chanchin a sawi.