England hneha ngamtu Spain-in ro an rel! Duhtak Football, rûn lawi zai i rel lo'ng maw?

Kum 58 zet a ni ta - England-in lawm hla an la rem nawn thei lo. World Cup 1966-a an champion hnuah Three Lions-in major trophy an la chawi thei lo chhunzawm zel a, rilru na takin Berlin khawpui an hawsan leh ta.

Pathianni zan khan Euro final-ah England leh Spain an intawng a, inkhelh thiam zawk Spain an chak a, England-in kum 58 zet hliam an lo neih tawh tuam dam an tumna chu a hliamah tak chi an lo phul belh a, football-in rûn lawi zai a rel thei lo!

Olympiastadion, Berlin khawpuiah Spain-in 2-1 in hnehna an chang a, nomawi an hawn. La Roja tan Nico Williams chuan goal hmahruai a khung a, England-in Cole Palmer hmanga si phurh sutin beiseina an nei thar.

Mahse, Three Lions beiseina chu chhum rei lotê langa ral leh ang chauh a ni. Hun tawp nan minute li chauh a awm tawh tihah Mikel Oyarzabal chuan chakna goal a khung a, England tan chhanletna hun a awm tawh lo - Europe champion chu Spain an ni e.

A hmuhnawm

England boss Gareth Southgate-a'n quarterfinal leh semifinal-ah 3-4-2-1 formation hmangin, England a chet ṭhatpui viau a, mahse, he formation hi final-ah a ring chhunzawm ngam lo. English coach hian fimkhur taka khelh chu a finthlak zawkah ngaiin, 4-2-3-1 a hmang a, Spain coach Luis de la Fuente pawhin he formation tho hi a hmang.

Southgate-a'n hliam dam kawr Luke Shaw chu tun inelnaa left back-a a hman Kieran Trippier aiin a ring zawk a, Manchester United defender-in ni 148 hnua inkhel bul a ṭan leh hmasak ber a ni a, England tan bik chuan June 2023 hnua a bul ṭan hmasak ber a ni.

Team pahnihin chak ngei tumin an innawr tawn a, inkhel hmuhnawm a ni. Spain tan Nico Williams a nung nghal viau a, chance tia sawi tur mumal erawh a nei thei bik lo - Athletic Bilbao winger hian minute 12-naah shot-na hun ṭha a nei a, mahse, John Stones chuan ṭha zeta slide chungin a lo dansak hman.

Spain tan Robin Le Normand chuan hnai takah a tauh over luah a, first half hun pek belhah England an vannei teuh hle - ven loha awm Phil Foden chuan goal hmahruai khung theihna remchang a nei a, mahse, hnai tak aṭangin uiawm takin a hlah.

A neitu Spain

Chawlhlawk hman a nih hnuah Spain an hriam sawt a, eng thu nge an ngaihthlak bik? tihpalh mai awl khawp a ni - second half ṭan aṭanga minute hnihna lekah Spain team movement mawi kan hmu a, an hlawhchhuah chu goal a ni.

Lamine Yamal-a siamsak ṭha zet chu Nico Williams chuan goal-ah a chantir a, kawr var nena, "Rûnah a lawi dawn e..." tia zai vawr England fans an ngawi. Mahse, minute 73-naah Cole Palmer a inlar a, Chelsea player thiamzia kan hmu.

Jude Bellingham-a'n duhthusama pet tura a chhawpsak chu Palmer hian goal sirah mawi zetin a khung a, England fans an lam ve leh ta - Marc Cucurella tihsual aṭanga ball kal zel a ni a, Jude Bellingham siamsak a ni.

Mahse, an hlim chhung erawh a rei lo a, England substitute-in an tih theih chu Spain substitute pawhin an ti ve thei. Captain Álvaro Morata thlaktu Mikel Oyarzabal a inlar a, Real Sociedad forward hian Cucurella siamsak chu a tlawh goal a, Spain-in chak nan an hmang zui.

Team hmuhnawm

Spain-in match sarih an khelhah hnehna an chang vek a, champion an phu hle - nomawi chawi tura an zinkawngah Croatia, Italy, Germany, France leh England te chu an hneh zinga tel an ni a, an team hmachhawn hi thlir vang vang ila, champion an phu tih loh rual a ni lo.

Spain hi an vanneih zan ni se, goal tam zawka chak thei an ni hial. Nico leh Yamal te wing-ah an hmuhnawm takzet a, player pahnih hian nuam tiin football an khel tih a chiang - an che vel dan chu England tlarhnung tan hna a tling a, an hah ngawt ang!

July 13-a kum 17 tling ve chiah Yamal a puitlin tawk lohna erawh a hmawr a bawk thei ṭhin lo chu a ni a, hnai set sawta a chance neih Jordan Pickford-a'n a dansakte chu uiawm a tling a, hetihlai hian forward Dani Olmo pawhin amah chauha top scorer award dawn theihna chance a neih a chhawr lo.

Spain hian hliam vangin an thiampuipa Rodri chu minute 46-naah chân mah se, an talbuai phah lo a, captain Morata sawi hmaih a thiang lo. Atletico Madrid striker hian khelmualah hruaitu nih a tlin a, 100% a pe tih a chiang - a goal khung tur John Stones-a'n goal line aṭanga a lo petchhuah chu a ui ve ngawt ang.

Rûn a thim

Euro 2020-ah England-in final an lo lut tawh a, penalty-ah Italy ngam loin an champion zo lo. Euro 2024-ah final an lut leh a, hun tawp dawna an goal chhuah avangin an tlawm leh ta - Three Lions fans tan chuan a na vawng vawng ang.

England tan striker Harry Kane-a'n final thlengin beisei a phak lo a, minute 61-naah lakchhuah niin, Ollie Watkins a lut. Mahse, Aston Villa striker hian semifinal angin thilmak a thlentir thei ta bik lo a, a chance neih ṭhat tur ball a la per hrette chu uiawm a tling.

Bellingham leh Foden an thawkrim takzet a, mahse, La Liga player of the season leh Premier League player of the season te hian an theihna an pho chhuak thei lo a, an chance neih an chhawr lo ve ve bawk.

Minute 90-naa England chance neih lut ta lote kha uiawm tak a ni. Declan Rice-a tauh ṭha zet chu Unai Simon-a'n dansakin, a per lehlam hi Marc Guehi chuan tauh mah se, goal line-a ding Olmo chuan a lo tauh chhuak - Rice-a'n tauh nawn lehin, a over ta thung a, a goal khung ang maia a ball tauh chhuah lawmtu Olmo-a'n minute rei lote hnuah an champion a lawm zui.