Messi 'Argentina' ropuina a sang zual zel
A nei apianga pek belhchhah an ni - tih ang deuh kha a ni ber e. World champion Argentina chuan Colombia 1-0 a hnehin Copa America 2024 champion an ni leh ta. Goal awmchhun hi Lautaro Martinez-a'n extra time tawp dawn lama a khung a ni.
Lionel Messi awmna Argentina hian a zawnin Copa America nomawi an chawi a, South American ramte football hmanga inelna lian leh sang berah vawi 16 champion tawhin ram hlawhtling ber an ni ta.
La Albiceleste leh Uruguay ten tun hma chuan record inṭawm an nei ṭhin, vawi 15 champion tawh an ni. Tunah chuan Lionel Scaloni leh a naute an kal fal ta chiah a, midang chungah an leng mek.
Hliam leh buaina
Nimin zing Hard Rock Stadium-a final khelh hmain buaina a chhuak - Mizoram aṭang chuan zing dar 5:30 a inkhel tur ni mah se stadium luh dan chungchangah buaina a thleng a, hei vang hian darkar khat chuangin ṭan hun a tlai phah.
Argentina hi rinkai zawk ni mah se tun hnaiah Colombia an khelh ṭhat em avangin an nep bik lo, goal hlauhawm pawh an nei nual. Forward Jhon Cordoba-a'n a awma ball a lakthlak hnuah tawih zetin shot mah se goal ban hrulah a liam.
Midfielder Jefferson Lerma a hmuhnawm, box pawn aṭangin na zet a shot chu keeper Emi Martinez chuan a lo tawk hman hram a, goal ban hrulah liamin Argentina an him leh phawt.
Hliam damkawr Messi a langsar hleithei bik lo a, ball a cross tawh hnuah Miguel Borja chuan Messi hi a ti tlu a, inkhel zui mah se second half-ah a tlu nawn, khel zui thei tawh loin mual sir aṭangin mittui nen a ṭhiante inkhel a en a ngai.
Martinez-a goal
Argentina tana a match hnuhnung ber kheltu Angel di Maria pawh a vannei thei bik lo, box sir lam aṭanga a goal khung tur chu Colombia goalkeeper Camilo Vargas chuan a lo dansak hman.
World champion tan sunstitute Nicolas Gonzalez a rawn che na viau, goal khungah pawh a inngai - mahse VAR hman a nih hnuah offside tih hmuh a ni a, a ball tauh ṭha tak mai chu goal ban hrulah a liam chiah bawk.
Hun pangngaiah goal a lut lo, extra time khelh a ngai - goal kan hmu mai chuang lo. Rilruah penalty shootout a lang hman, mahse Colombia tlarhnung pawp zeuh karah Martinez a rawn dawk chhuak.
Inter Milan striker hi chak lutuka rawn dawk chhuakin, box sir lam aṭangin a kangin a khung; keeper Vargas khan a theihtawp chhuah mah se ball a rangin a hnai tawh si a, atan dan theih a ni lo - Argentina champion nan a tawk.
Messi leh nomawi
Player ropui bik a ni a, club tan hlawhtlinna hrang hrang a chan kim bakah mimal chawimawina sang dawng tam fal ber a ni. Mahse, kum 34 mi a nih thleng khan Argentina tan nomawi lian chawi a nei lo, an sawisel ṭhin chhan pawh a ni.
Mahse, hun a inher hret a, kum 16 a nghah tlin meuh chuan Copa Amarica nomawi pahnih bakah World Cup a kawlkhawm ta, Copa leh Euro champion inelna Finalissima a nei tel bawk. Argentina tan hian Olympic gold medal a lo hlawh chhuak tawh bawk.
Paris Saint German aṭanga a chhuah dawn khan duh ni se la chuan Europe-ah a la inkhel thei ang, sum um ni se la chuan Saudi Arabia lamah a kal thei bawk ang, mahse nuam ti leh hahdam deuh zawk mai bakah, an naupan lai nunphung pangngai anga inkhelh duh vangin United States a pan.
Copa America final an khelhna hi Messi khelhna club Inter Miami awmna ṭanga mel 20 bawr vel chauha hlaah a ni a, he hmunah hian World Cup 2026 pawh an khel dawn - khawvel huap inelna lian berah hian nuam ti takin ala inkhel leh mai thei.
