Djokovic hnehtu Alcaraz a champion

Carlos Alcaraz chuan Wimbledon nomawi a kawl lai a humhim - Spanish star hian player ṭha bik Novak Djokovic chu 6-2, 6-2, 7-6 (7-4) a hnehin grass court inelna lian berah a kum zawnin a champion.

Season hmasa khan player pahnihte bawk hian final an khel, an intawn hmasak hian set nga an khel. Pathianni zan final-ah erawh Alcaraz hi kawng engkimah a chungnung a, nuamsa takin hnehna a chang.

Wimbledon mipa singles-ah Alcaraz a champion a, ani hi Spanish mi a ni - football inelna Euro final khelh zui niin Spain an champion leh bawk. Kum 2008 khan hetiang thil hi a lo thleng tawh - Rafael Nadal champion kumah Spain chu Euro champion an lo ni tawh bawk.

Inkhelh zawhah kum 37 mi Djokovic tan Wimbledon hnuhnung ber a ni mai ang em tih zawhna a awm nghal, mahse tun dinhmunah chuan Novak hian grass court inelna lian mangṭha mai tumna a la nei rih lo tih a sawi.

Mi bik Alcaraz

Roger Federer, Rafael Nadal leh Andy Murray te hun a liam a, tunah chuan Novak Djokovic hun pawh a liam ve mek niin a lang - mipa tennis huangah tunge rawn chawr chhuak ang tih zawhna a awm ṭhin, a chhanna chu 'Carlos Alcaraz' tih a ni.

Alcaraz hian theihna sang tak a neih bakah a rilru a huaisen - Wimbledon 2024 final kalkawngah pawh hian straight set hmanga chak chu vawi hnih chiah a nei, harsa takin final a in vaw kai hram hram.

A bik takin player ṭha Daniil Medvedev, Tommy Paul leh Frances Tiafoe te laka a hnufual hnuah a chak let leh thei vek a, chak lo thei dinhmuna a din hnuah pawh a rilru a hnual ve ngai lo tihna a ni.

Nomawi inchuhna inkhel an thlen meuh chuan a service vawi khat chiah a hloh a, hetih lai hian player ṭha Djokovic-a service chu vawi nga lai a chhuhsak hman, set hnuhnung berah inkhel tawk ve deuh mah se, a hmasa pahnihah erawh a chungnung viau.

Nomawi lian pali

Carlos Alcaraz hi kum 21 mi a ni a, a la upa lo - kum naupang te ni chungin Grand Slam nomawi pali a chawi der tawh thung. Wimbledon title pahnih bakah hian French Open leh US Open champion a ni tawh.

Tun season bikah phei chuan French Open leh Wimbledon title a lak inkarah chawlhkar nga vel chauh a tla a, hun chep leh tepter tak karah inelna lian pahnih hmachhawn chungin a champion thei tho tihna a ni.

Tennis khelhna hmun a inang lo a, clay, hard leh grass court-ah te ball kal dan a danglam vek. Alcaraz hian heng hmun pathumah hian major title a la vek thei a, tournament ang zawng chu Australian Open a la hmabak thung.

Australian Open bikah hian kuminah quarterfinal a lut a, a thlen san ber a ni. Player ropui bik dangte huanga lut ve tur chuan Australian Open champion nih theih a pawimawh, season thar a nghah erawh a ngai dawn a ni.

Fiahna paltlang

Set hloh miah loin Alcaraz a chak a, chutihrualin set thumna a lak dawn khan a service laiin 40-0 ni hman mah se tawnhriat nei Djokovic a ṭang thei hle. Serbian star hi a tho chhuak mai dawn emawni tih tur khawpin a awm hman mah se Alcaraz-a'n fiah a dawl thung.

Alcaraz chuan, "Djokovic hi harsatna hrang hrang paltlang tawh a ni a, championship point ka hmuh tawh hnu pawh khan thil a la danglam thei tih ka hria, a nihna takah chuan ka service aṭanga point khat hmuh belh zeuh ka tum pawh kha a harsa.

"Tie break kan khelh a ngai ta ngei a, mahse kha hunah chiah khan tun tournament ka khelh lai zawnga ka chet fuh ber ṭum ka tawng thung, ka harsatna tawh ka chingfel thei kha a lawmawm takzet a ni," tiin a sawi.

Grand Slam hi chu a boruak a danglam, set hnih hloh hnuah pawh a thawh chhuah leh theih. Djokovic pawh khan a tawp thlengin beisei a nei, mahse vanglai hmang mek Alcaraz a ding nghet tlang ta zawk a ni.

Djokovic a inpawm

A chak lo zawk a ni a, tun hma lama sulhnu ropui leh nei ṭha zawk ni mah se Novak Djokovic chuan tun dinhmunah Carlos Alcaraz chu amah aia player ṭha leh chungnung zawk a ni tih a pawm tih a sawi.

Serbian star chuan, "Zep tur a awm lo, final kan khelh chhung khan player ṭha lo zawk ka ni. A ball vuak apiang mai kha kei aiin a ṭha zawk," tiin a hneh loh Alcaraz chu champion phu zawk a ni tih a sawi a, a lawmpui bawk.

Grand Slam nomawi 24 chawi tawh Djokovic hian Wimbledon title bik pawh pasarih a nei tawh a, champion tam ber Roger Federer-a record (8 titles) chu nihrual theihna remchang nei mah se a la hlawhtling thei rih lo.

Kum 37 mi Djokovic hi French Open khelh hnuah a khup hliam zai a ni a, tun hma angin a ṭhat dan takin a la khel leh rih lo tih erawh hriat a ṭha. An ram Serbia tan Paris Olympic khel turin a inbuatsaih chhunzawm lehnghal ang.