Man United striker thar Zirkzee

Manchester United chuan Bologna aṭangin Joshua Zirkzee an lakluh thu an puang a, Netherlands international striker man hi pound maktaduai 36.54 a ni.

Kum 23 mi Zirkzee hian kum nga daih contract a ziak a, kum khat dang pawhsei theih dan a awm bawk. Zirkzee release clause chu 40m euros (£33.6m) ni mah se kum thum chhunga pek tlak an duh avangin Man United-in £3m bawr vela pek tam an thlang.

Man United hian Profit and Sustainability Rules zawm an duh vang a ni a, kum thum chhunga an pek tlak hian Zirkzee man hi kum khata £12.18m pe ang zel a ni ang. Season liam ta khan PSR dan zawm lo, Everton chu point paihsak an ni a, point khat hlawhchhuah a har avangin club tin an fimkhur hle.

Tu nge Zirkzee?

Euro 2024-ah Joshua Zirkzee hi Netherlands squad-ah Ronaldo Koeman-a'n a ko a, Dutch team hian semifinal hial an thleng. Amaherawhchu, Zirkzee hi match hnih chiah inlanin minute li chauh a khel a, a tlan zat belhkhawm pawh 1.57 km chauh a ni.

Koeman-a chhawr dan aṭanga thlir chuan Man United tan Zirkzee lakluh hi lawmna tur niin a lang lo. Chutihrualin kum 23 mi chauh a ni a, hmabak êng tak a nei tih erawh hriat a ṭha.

2023/24 Serie A Under-23 Player of the Year Zirkzee hi 6ft 4in-a sang a ni a, Feyenoord academy-a inzir hnuah Bayern Munich-ah inzir chhunzawmin Bavarians senior team tan pawh a khel hman. Bayern tan Bundesliga-ah match 12 khelin goal li a khung.

Bayern-a a awm lai hian 2020-21 season khan Parma-ah loan hmanga kalin beisei a pha lo a, match li chauh khelin goal a khung lo. 2021–22 season khan Anderlecht-ah loan hmanga kal lehin Belgian Pro League-ah match 38 khelin goal 16 a khung a, assist vawi kua a nei bawk.

Bologna-in Zirkzee hi £7.15m-in an lalut a, Serie A-ah a che chhe lo. Dutch striker hian season khatnaah match 19 khelin goal hnih a khung a, season liam ta khan league match 34 khelin goal 11 a khung.

No. 9 a ni lo!

Zirkzee hi tun lai striker ang hi a ni lo a, a khelh dan hmang hi Premier Leasgue-a striker awm sa Erling Haaland, Darwin Nunez, Ollie Watkins leh Rasmus Hojlund te nen a khelh dan hi a inang lo.

Dutch striker hi tlan chak tia sawi tur a ni lo a, 6ft 4in-a sang ni mah se tharum a hmachhuan lo a, a ball thiamna hi a hmaa defender dingte paltlang nan a hmang zawk.

United striker thar hi out and out striker ni loin no. 9 leh no. 10-a khel kawp thei a ni a; Old Trafford-ah Zlatan Ibrahimovic, Dimitar Berbatov, Wayne Rooney leh Eric Cantona te sulhnu chhui thei tura ngaitu an awm hial.

Bologna-a Zirkzee enkawltu Thiago Motta chuan, "A idol chu Zlatan Ibrahimovic leh Gabriel Batistuta te niin a sawi a, player ṭha ve ve a ni. Mahse, ni tina a khelh dan ka hmuh hian Barcelona-a ka khelhpui ṭhin Ronaldinho min ti hre chhuak," tiin kumin February thla khan a lo sawi tawh a ni.

Motta chuan sawi chhunzawmin, "A nihna takah chuan player dang nena khaikhin ka duh lo a, amah hi Joshua a ni a, theihna danglam tak a nei a ni," tiin a sawi.

Engtin zel?

Bologna-a che ṭha tur hian Zirzkee hian hun a mamawh a, season hmasa berah a che ṭha lo. Season hnihnaah che ṭhain Motta hian Zirkzee hi 'false nine'-ah a chhuah tiin a sawi theih.

Season liam ta khan Zirzkee hian Serie A-ah through ball vawi sarih a pe dik a, striker zinga through ball pe dik tam pahnihna a ni a, a tluk loh chu Lisandro Martinez niin Argentine striker hian vawi 12 a pe dik.

Man United player nena khaikhin chuan season liam taa Zirzkee aia through ball pek dik tam chu Kobbie Mainoo (8) leh Bruno Fernandes (30) chauh an awm. Zirzkee hian ball pawh a khawih tam a, season liam ta khan chawhrualin minute 90 chhunga vawi 44.8 zel ball khawih ang a ni. Premier League centre forward zingah amah aia chawhruala ball khawih tam chu Matheus Cunha (45.0), Gabriel Jesus (47.7), Bryan Mbeumo (47.9) leh Joao Pedro (52.7) te chauh an awm.

Ronaldinho nena an khaikhin hial Zirkzee hian ball a keng thei viau a, season liam ta khan minute 90 chhungin chhawhrualin 26.5 zel ball a keng. Premier League striker zingah Cunha (26.5), Cody Gakpo (30.0), Mbeumo (30.6) leh Joao Pedro (34.7) te chauh hemi kawnga amah aia record ṭha an awm.

United-in an mamawh?

Man United hian Anthony Martial an chhuahtir avangin striker thar lakluh an mamawh a, chutihrualin kum naupang Rasmus Hojlund an neih tho avangin tawnhriat nei striker an mamawha ngaitu an ṭhahnem hle.

Zirkzee hi Hojlund nena khaikhinin season liam taa an chet danah chuan record a nei ṭha hret a, Ten Hag-a chhawr dan tur hi a pawimawh ta ber chu a ni. Dutch manager Ten Hag chuan, "Ka khelh dan hmang rawn chhawm nung turin Old Trafford hi ka rawn pan a, chutihrualin Manchester United khelh dan phung nena kalkawp ka duh.

"Season liam ta khan football ṭha tak kan khel a, tun season-ah kan duh dan a danglam lo. A inan lohna chu hma zawngin kan kaltir tam a, kan khingpuite kan dan chah hnuah na taka nawr nghal kan duh," tiin nikum November 2023 khan a sawi.

Ten Hag-a duh dan ti hlawhtling turin Zirzkee hian theihna a nei a, mahse Dutch striker hi a thiam a la nghet tawk lo a, a puitling tawk lo. Chutihrualin Zirzkee hi mual sira tlan ṭhin Alejandro Garnacho leh Marcus Rashford te nena an inkawp fuh chuan an hlauhawm viau tura ngaih a ni.

Chutihrualin Premier League hi a awlsam lo a, theihna nei sang Chelsea striker Nicolas Jackson pawhin hming chher a harsat a, kar tina chet ṭhat hi Zirkzee tan pawh a harsa dawn. A vanneihna erawh Euro 2024-ah a inlan tam loh avangin Man United ṭantute pawhin beisei an nei sang ngam dawn lo a, pressure a ngah lo ang.