Naupang duhawm Lamine Yamal

Euro 2024-ah Spain-in rawlthar duhawm pahnih an nei a, an hming chu Lamine Yamal leh Nico Williams a ni - a tawpah chuan a kum naupang zawk Yamal chu Young Player of the Tournament atan thlan a ni.

Yamal hi Euro 2024-a match sarih an khelhah a inlan vek a, heng zinga match rukah hian bul a ṭan. A bul ṭan lohna awmchhun hi round of 16 an luh chian hnua Albania nena an inkhelhna chu a ni a, game pawimawhah chuan bul a ṭan vek.

Tun inelnaa an match hmasa bera Croatia an hmachhawn khan bul ṭanin, kum 16 leh ni 338 mi a ni a, European Championship-a inlan thei naupang ber record a siam. Semifinal-ah goal mawi bik khungin, France laka a goal khung avang hian Euro-a goal khung thei naupang ber a ni nghal - kum 16 leh ni 362 mi a ni.

Barcelona forward hian July 14, Inrinni khan kum 17 a tling ve chiah a, Euro emaw World Cup emaw final-a inlan thei naupang ber a ni - a record hi assist hmangin a lawm zui a, Nico-a goal khung tur a siamsak.

Yamal hian minute 507 zet khelmualah hun hmangin, goal khat a khung a, assist vawi li a nei - tun inelnaah ani aia assist hnem an awm lo a, ani aia dribble (32) nei hnem an awm lo. A tlan chak lai berin 33.3 km/h in a tlan.