Rodri a thiam ber

UEFA EURO 2024 Player of the Tournament atan Spain thiampuipa Rodri chu thlan a ni a, Manchester City midfielder hi Spain tan Fabián Ruiz nen central midfield-ah inkawpin an che vel chu mit titlai a tling - Rodri hi a team tan 'solfa' vaitu a ni a, tlarhnung venpui lama a pawimawh tluk zetin goal nawr kawngah a ṭangkai tel.

Rodri hian Euro-a match sarih an khelhah match ruk chu bul a ṭan a, a minute khelh zat hi minute 521 a tling - goal khat a khung a, vawi 439 zet pass neiin, heng zingah hian vawi 411 a pass dik a, a pass dik zat hi 92.84% a tling hial.

Kum 28 mi Rodri chuan, "Ka career-a ka ni tawn duhawm ber a ni a, thil harsa tak ni mah se European champion kan ni ta a, Europe-a team hlawhtling ber kan ni ta! Thawnthu thar kan ziak a, tun dinhmun thleng tur hian world champion lo ni tawh pali lai kan hneh thei. Draw hautak zet kan paltlang a, kha ringawt pawh khan kan team rilru paukhauhzia a pholang," a ti - Spain hi vawi li champion tawhin, Euro-a nomawi chawi ngun ber an ni.