Germany legend Muller a chawl ta

World Cup winner Thomas Muller chuan nimin khan ram tana inkhelh a chawlhsan thu a puang. German forward Muller chuan, "Mangṭha tih a hun ta," tiin social media kaltlangin a chawlh tur thu puang a, thlalakah Germany jersey no. 13 a hakna hmangin an ram flag a keng tel bawk.

Kum 34 mi Muller hi team tana ṭangkai player a ni a; forward emaw second striker emaw a khel ṭhin a ni a, amah chuan position hi 'raumdeuter' (Midang tana hmun awl siamsaktu) niin a sawi thung.

Bayern Munich aṭanga inzir chhuak Muller hi one club man a ni a, Bavarians tan chauh a la khel. Khawvel huapa hming a chherna chu 2010 World Cup-ah a ni a, goal nga bakah assist vawi thum a neih avangin Golden Boot a dawng a, Best Young Player-a thlan a ni bawk.

Germany hi World Cup hmasa berah pathumna a nihpui a, ram tan player pawimawh ni zuiin Euro 2012-a semifinal an thlen ṭumah pawh player pawimawh a ni.

Muller tana hun chhinchhiahtlak ber chu World Cup 2014 a ni a, Germany a champion pui bakah semifinal-ah inelna thlengtu Brazil 7-1 a an sawp ṭumin goal hmahruai a khung.

Germany-in nomawi an chawi ṭumah hian Muller hian Silver Boot leh Silver Ball a dawng a, All Star team-ah thlan a ni bawk. German forward hian ram tan match 131 khelin goal 45 a khung a, assist vawi 41 nei bawkin sulhnu a nei ṭha hle.

Chutihrualin Muller hi a kum a tam ve tawh avangin kumin Euro 2024-ah erawh ram tan hmun pawimawh a chang pha tawh lo a, match hmasa bera Scotland 5-1 an hneh ṭum leh Spain laka an tlawm ṭumah chauh a inlan a, minute 56 chauh a khel chungin assist vawi khat a nei hman tho.

Bayern Munich hotu zinga mi Herbert Hainer chuan, "Thomas Muller hi Germany jersey ha tawh zinga ropui ber zinga mi a ni. A khelh dan hmuhnawm danglam tak avangin khawvel hmun hrang hranga football fan-te aiawhin Muller chungah lawmthu ka sawi a ni," tiin Muller a fak hle.