Southampton-in Sugawara an la lut

Premier League kai thar Southampton chuan Dutch club AZ Alkmaar aṭangin Japan defender Yukinari Sugawara an la lut. Kum 24 mi Sugawara man hi puanzar a ni lo a, £6mtd bawr vel tura ngaih a ni.

Japanese defender Sugawara hian kum li daih contract a ziak a, Saints hian tun nipuiah player pasarih an lakna a ni a, tlarhnung lam player pangana a ni bawk.

Saints manager Russell Martin chuan, "Sugawara hi hun rei tak kan enthla tawh a, right back atana kan duh ber a ni. A kum hi duhthusam a ni a, European football-ah tawnhriat ṭha tak a nei bawk.

"Player theihna nei sang tak a ni a, a rilru put hmang a dik a, a ṭhiante pawhin khelhpui nuam an ti ang. A chet ṭhat ngei hi kan ring," tiin a sawi.

Sugawara hian J League club Nagoya Grampus aṭangin bul a ṭan a, June 2019 khan loan hmangin Dutch club AZ a zawm. Netherlands-ah hian kum nga chhung awmin inelna hrang hrangah mach 198 a khel tawh a, Europe inelnaah match 53 hial a khel tawh bawk.

Japan tana vawi 13 khel tawh Sugawara chuan, "Season liam ta khan pre season-ah Southampton kan hmachhawn a, game ṭha tak an khel a, ball an vawrh lo a, hnai takah ball inpein an khelh dan a fing hle. Saints hi team ṭha takah ka ngai a, amahni aṭanga sawmna ka hmuh khan second khat hnuah 'aw' ka ti nghal," tiin a sawi.