Asian Cup Final-ah South Korea Vs Australia

Kum 55 chhung Asian Cup chawi tawh lo South Korea-in an record duhawm loh tak nuai reh turin minute 90 an la hmabak. An khingpui tur chu inelna thlengtu leh United Arab Emirates hnehtu Australia an ni.

Thawhṭanni tlai khan South Korea-in final lut turin 2007 Asian Cup champion Iran chu Lee Jeong-hyeop leh Kim Young-gwon te goal hmangin 2-0 in an hneh.

Nilaini tlaiah Australia-in first half-a Trent Sainsbury leh Jason Davidson te goal hmangin Japan hnehtu UAE an hneh. Australia hian second half-ah goal khung lo mah se inkhel an thunun a, chak an phu hrim hrim bawk.

Captain Thukhawchang

South Korea captain Ki Sung-yueng chuan, "Team chhunga awm zawng zawng hian champion kan duh a ni. Captain ka nihna angin team kaihruaitu nih ka duh a ni. Kum 55 chhungin nomawi kan chawi lo a, a zahthlak hlein ka hria. Chuvangin hun ṭha kan neih hi kan bawhpelh tur a ni lo," tiin a sawi.

Ki chuan sawi chhunzawmin, "Chak turin tlar hnung an thawkrim em em a, ball zawng zawng lak vek an duh a, concentration an hloh lo bawk. Hei hi goal kan chhuah lohna chhan a ni. Asian Cup ang inelna liana match nga chhung goal chhuah loh chu a harsa dawn a, amaherawhchu final-ah goal chhuah loh kan duh," tiin a sawi.

Goal khungtu a ṭawngchhuak

Australia tana goal hnihna khungtu Davidson chuan, "Kum 14 leka upa ka niha kan in ka chhuahsan aṭangin ka duhthusam chu Australia tana khelh a ni. Kan ramin Asian Cup final an thlen theihna tura goal ka khung hi ka lawm tak zet zet a, mumang ang mai a ni," tiin a sawi.

Asian Cup-ah Australia hi an la champion ngai lo.