Blatter elpui tur Van Praag

Dutch FA president Michael van Praag-a'n FIFA president a chuh tur thu a ti chiang.

Ajax chairman hlui Van Praag chuan, "FIFA chet dan hi ka ngaihtuah takzet tih chu mi zawng zawng hriat a ni. Blatter-a elpui tur ṭha tak hi ka beisei a, mahse chutiang ang ṭha an awm tak loah chuan ṭawng chauh a tawk lo - din chhuah ve ṭul ta ni," tiin a sawi.

President chuh pha tur hian FIFA hnuaia football association-in panga tal pawmpuina a ngai a, kum 67-a upa Van Praag chuan ram panga aṭanga ṭawiawmna a neih thu a sawi.

President nilai Sepp Blatter elpui turin Van Praag leh Jordan Prince Ali Bin Al Hussein te'n president chuh turin hming an pe lut tawh a, tel tura beisei Jerome Champagne erawhin a la tichiang ve lo. Ninga­ni thleng president candidate tana hming pek luh theih a ni.

France leh Premier League star hlui David Ginola pawhin FIFA president chuh a tum thu hi a lo sawi tawh a, amaherawhchu ram panga aṭanga puihna a hmuh beisei a ni lo.

Fifa electoral committee member Dominico Scala chuan hun bithliah zawh hnuah chauh candidate zir chianna an neih tur thu a sawi. President candidate ni tur hian anti-corruption test an paltlang phawt a ngai.

FIFA election hnuhnung pali

2011 : Mohamed Bin Hammam chu inthlan hma hreta a inhnuhdawh avangin chuhpui nei loin Blatter-a tling nawn.

2007 : Blatter-a'n chuhpuitu a nei lo.

2002 : Blatter-a'n amah chuhpuitu African confederation Issa Hayatou hnehin a tling nawn.

1998 : Blatter-a'n UEFA president hlui Lennart Johansson hnehin FIFA president hna a chelh ṭan.