UEFA-in min dodal turin huaisenna an nei lo - Blatter

FIFA president chelh lai Sepp Blatter chuan amah dodal tur candidate UEFA-in an thehchhuah ngam loh thu a sawi.

Europe a football thuneitu sang UEFA hian Blatter hi 2018 leh 2022 World Cup thlengtu tur thlan danah an sawisel a, president chelh zui zel tlakah an ngai lo.

Amaherawhchu, Blatter chuan UEFA president Michel Platini chuan ṭawiawmna a neih ṭhat tawk loh avangin a din ngam loh tur thu a sawi.

Blatter chuan, "Mi zawng zawng tihlawm hi a theih loh. National association tam takin president ni tlak khawpa ṭha an hmuh loh avangin ding leh turin min ngen a ni. UEFA hian ka rorelna hun hi tihtawp an duh a, an duh a nih chuan min elpui tur a ni. Min elpui tur khawpa huaisen an neih loh chuan min sawiselna hi tawp tawh rawh se chuan an zahawmna an humhim ang," tiin a sawi.

FIFA president term li chelh thei Blatter chuan sawi chhunzawmin, "2011 aṭangin FIFA siam ṭhat hna hi kan ṭan a, kan la zo lo. Kan hna kalpui mek zo tur hian kum li dang ka la mamawh a ni. Football hi team-a khel tur a ni a, team angin kan thawk ho tur a ni. UEFA hi min ṭawiawm tur ka sawm a, a bik takin an hruaitu nasa taka min sawiseltute hi ka sawm a ni. Khawvel chuan inthurualna a mamawh a ni. President ka chuh vawi khatna a ni lo a, keimahah hian inrintawkna ka nei a, football hmel hi kan thlak danglam thei a ni," tiin a sawi.