Zaninah Atletico Vs Barca

Barcelona-in goal khat nei chungin Vicente Calderon an lut dawn. Zanin dar 1:30 hian Copa del Rey quarterinal second leg-ah Atletico Madrid leh Barcelona te an inkhel dawn.

Kar hmasa khan Catalan club chuan hun tawp hma minute nganaa Lionel Messi goal hmangin hnehna an chang a, semifinal thleng turin draw tawk.

Chutihrualin Atletico Madrid hi Barcelona elpui pha turin an ṭha tawk. Barcelona hmachhawn turin Diego Simeone hote hian champion lai Real Madrid an hneh tawh a, Barcelona erawh tun thla chhungin ṭum hnih an hneh tawh lo; semifinal-a Villarreal emaw Getafe emaw hmachhawn tur chuan zaninah Barcelona an hneh a ṭul dawn a ni.

Barcelona defender Jeremy Mathieu chuan Thawhṭanni khan training a zawm leh tawh a, inkhel tlak a ni tawh em tih erawh a chiang lo. Kartawpah Luis Suarez bench-ah a ṭhu a, Atletico hmachhawn turin tlar hmaah Lionel Messi leh Neymar te nen an inkawp a rinawm.

Uruguay forward hian Sergio Busquets, Andres Iniesta leh Dani Alves te starting eleven-ah an kir hmel a, keeper-ah erawh second choice goalkeeper Marc-Andre ter Stegen-a'n a ven a rinawm.

Atletico Madrid-in defender Diego Godin chu hrem vangin an chhawr thei dawn lo a, defence laiah Jose Gimenez leh Miranda te an inkawp ang. Diego Simeone-a'n tlar hmaah duh thlan tur a nei a, Fernando Torres aiah tun season-a Atletico top scorer ni mek Mario Mandzukic a thlan zawk rin a ni.

Kartawp La Liga inkhelah Barcelona-in Elche 6-0 in an sawp a, inelna hrang hranga an match hnuhnung parukah an chak vek bawk. Chumai a ni lo, an match hnuhnung paliah goal an chhuah lo.

Atletico hian kar tawpah an chak ve tho a, Rayo Vallecano 3-1 in an hneh. Goal kungtu zing ami French forward Antoine Griezmann chuan, "Barcelona kan hmachhawn hunah kan theihna zawng zawng kan lantir dawn. Mipui puihna nen semifinal kan thlen theih ka beisei. Barcelona hi kan lehthal thei tih kan rin loh chuan kan chak dawn lo," tiin a sawi.

Atletico midfielder Tiago pawhin sawiin, "Barcelona tun hnaiah an khel ṭha em em a, match tinin hma an sawn tih kan hria. Mahse Barcelona hi kan hlau lo, anni kan khelhpui thei hi kan lawm a ni. Messi leh Neymar te ang world class player khelhpui hi kan châk a ni. Player angin ṭha mah se team angin kan dang thei ang," tiin an zam loh thu a sawi.

Messi-a'n Ballon d'Or dawng pha lo mah se field chhungah a thiam a la theihngilh lo a. Tun season-ah inelna hrang hrangah goal 31 a khung leh der tawh a, Brazilian forward Neymar nen an inkawp rem tawh bawk.

Barca president Josep Maria Bartomeu chuan, "Atletico hi team ṭha an nih avangin a harsa khawp ang. First leg-a kan chak avangin ngaih ṭha ringawt tur kan ni lo," tiin a sawi.