Barcelona leh Messi bula hlim Neymar

Barcelona a a season hnihna hmang mek Neymar chuan Lionel Messi nen an inkar boruak a ṭhat avangin nuam a ti hle.

Neymar chuan Barcelona ah a nun hlim ber hun lai a hmang mek nia sawiin, field chhungah Messi nen an game kalphung an inhriatchian telh telh vangin nuam a tih thu a sawi bawk.

Tun season ah Barce­lona chhungkaw boruak a ṭhalo hle a, an thiampuipa Messi leh coach Luis Enrique te hmalam hun a chianglo nia sawi reng niin Sporting Director Andoni Zubizarreta pawh ban a ni hial. Barcelona hi La Liga ah pahnihna ni mekin, an chung chiah ami aia an hniamna hi point khat chauh nimahse, an chunga awm hi an hmelma kumhlun Real Madrid annih avangin Barca tan chuan hei hi an boruak ti ṭhalo tu tling tham a ni.

Hetiang dinhmunah hian Neymar erawh mimal taka hmasawn nia a inhriat avangin a hlim hle. "Nitin hian hma ka sawn nimai in ka hria, mahse hmasawnna tur tam tak ka la nei tih ka hria a, title tam tak lak ka duh a ni, " a ti a, tun season La Liga a match 17 khela goal 14 khungtu Neymar chuan, "He hmunah hian pawimawh ve a inhriatna ka nei a, chutiang ngaihdan chu players tin in kan neih a ngai a ni. Goal khung hi chuan a nuam ṭhin a, ka season hnih na chauh nimahse field chhung leh pawn-ah ka tlangnel em em tawh a, nuam ka ti a ni;" a ti a, Messi nena inkhelh dun nuam a tih zia sawiin Neymar chuan, "Khawvela player ṭha ber bula khelh hi chu a awlsam bik em em a ni," a ti bawk.

Liverpool aṭanga Barcelona a pem hnua Andfield a a khelh ṭhin anga khel lo Luis Suarez a chungchang zawhna chhangin Neymar chuan," Kei aiin a upa a, experience a ngah zawk bawk. Suarez hian ka thurawn a mamawh lo, ka thurawn vanga ṭha tur a ni lo bawk. A khel ṭha a, goal khungin pass pawimawh tak tak a nei reng a, title min lakpui ngei ka ring a ni, " a ti a, Liverpool thiampuipa ṭhin chu a ringtawk hle.