Higuain goal hnih chakpuitu Napoli

Napoli chuan Champions League khel phak turin an dinhmun an sawhnghet zel a, an khelmualah Gonzalo Higuain goal hnih sawisel hlawh tak hmangin Genoa 2-1 in an tlawm.Thawṭanni a inkhel dangah Udinese chuan 2-1 in Empoli an hneh bawk.

Stadio San Paolo a inkhelah hian Higuain chuan hnai set sawt aṭangin a head goal a, Napoli hma a hruai pui. Goal hi Jose Callejon pet Genoa goalkeeper Mattia Perin-a'n alo dan per aṭanga head goal a ni a, hei hi enchian chuan offside niin a lang a, mahse linesman in a phar tlat lo. Iago Falque chuan minute 56 ah mikhual tan a rawn sut a, Mahse Genoa lawm chhung a rei lo, Genoa player Juraj Kucka chuan Higuain a nam thlu niin a lang a, mahse penalty pekna tur khawp niin a lang lo, mahse referee in a pe miau a, Napoli goal hnihna leh an chakna ni nghal bawk chu Higuain bawkin a rawn thun ta a ni.

Napoli hi tunah table ah pathumna ah awm mekin point 36 an hmu a, an chung chiaha awm point 42 hmutu Roma nen an inthlauhna hi point 6 niin, table chung berah point 49 hmutu Juventus an awm mek.

Inkhelh zawhah Napoli manager Rafael Benitez chuan referee thutlukna chungchangah engmah a sawi duh lo a, "Penalty pek kan nih hma khan 1-0 in hma kan hruai a, vawi 10 lai goal thun theihna hun ṭha kan nei bawk, referee chungchang comment erawh ka duhlo, kum khat dawn lai chu referee chungchang hi Juve kan tum ṭum tih loh kha chu ka comment ngai tawh lo a, tunah pawh hian ngawih ka duh zawk a ni," a ti a, referee thutlukna ah engmah a sawi duh lo.