Inkhelh hunin Indian fan-te tibuai
Kum li dana khelh ṭhin ICC Cricket World Cup chu thla thar February aṭangin khelh ṭan a ni dawn. India cricket fan-te chu inkhelh hun tur laklawh lutuk turin a tibuai tawh hle.
ICC cricket World Cup 2015 hi Australia leh New Zealand te'n an in thlen ṭawm dawn a, hun bi inang lo hi Indian fan-te buaina chu a ni. New Zealand-a an khelh tur match ṭhenkhat hi chu live a en tur chuan zing dar 3:30 ah te en a ngai dawn. Australia lama chhun a an khelh kha India-ah chuan zing dar 6:30 ah a chhuak ang a, zan inkhel hi India-ah chuan zing dar 9:00-ah en a ngai dawn bawk.
World Cup-ah match 49 khelh a ni dawn a, chung zinga match 24 chu New Zealand ah khelh tura ruahman a ni. New Zealand-ah hian zing dar 3:30-a khel tur match 13 a awm a, match hmasa ber chu Hagley Oval ground, Christchurch-ah a thlengtu New Zealand leh Sri Lanka te'n a khel ang.
ICC World Cup 2015-ah India chu Pool B-ah South Africa, Pakistan, West Indies, Zimbabwe, Ireland leh United Arab Emirates (UAE) te nen an awm ho a, February 15 a an match hmasa berah India hian Adelaide-ah Pakistan an tum dawn a ni.
2011 World Cup-a India leh Pakistan an intum ṭum khan khawvel pumah mi maktaduai 988 in inkhel an en a, tun World Cup-ah organiser-te chuan khami ṭum ai khan entu an tam an ring a, India hi champion lai an ni.