FA Cup-ah Stoke City an buai ve lo

FA Cup fourth round-ah Premier League club-te division hniam zawk club lakah an talbuai a, a chak ho pawhin awlsam takin hnehna an chang lo.

Thawhṭanni zanah Stoke City-in Premier League danglamna an rawn lantir a, League one club Rochdale 4-1 in an sawp.

Stoke tan Bojan Krkic, Stephen Ireland, Victor Moses leh Jon Walters te'n goal an khung a, mualneitu Rochdale tan Rhys Bennett-a'n goal khat a khung ve bawk.

Inkhel chu

Stoke-in bul an ṭan ṭha a, minute lina lekah corner aṭanga ball kal zel chu Bojan-a'n kawh zetin a volley goal a, Rochdale tlar hnung tan tih theih a tlem hle.

Barcelona youth system chhuak Bojan hian goal khung hma mah se darkar chanve lekah inliam vangin lakchhuah an ni. Bojan chhuah hnuah Rochdale an insiamrem a, mipui an phur bawk avangin inkhel an thunun chho a, Matt Done hmangin an siphurh an sut teuh hle.

Second half-ah Stoke City ṭha zawk an inlan a, Stoke boss Mark Hughes-a'n halftime-ah a player-te a hrilh ṭha hle tih a chiang hle.

Substitute Ireland-a'n minute 52-naah Stoke goal hnihna a khung nghal a, Moses-a'n minute kaw hnuah nalh zetin a hlai goal bawk.

Minute 78-naah Bennett-a'n freekick aṭangin a khung a, Rochdale-in beiseina thar nei mah se injury time-a Walters-a goalin an beiseina a tih tawp sak a. Stoke City 4-1 in an chak.

Engnge an sawi?

Rochdale boss Keith Hill chuan, "A tir aṭanga chak tuma nawr kha kan tum a ni a, amaherawhchu team ṭha tak kan tum a ni. League-a kan team inthlauh dan en chuan result hi a awm viauin ka hria. Bojan-a goal kha inkhel ti danglamtu a ni a, Stoke khan chak an phu zawk a ni," tiin a sawi.

Stoke manager Mark Hughes chuan, "Kan tum chu kan hlawh­tling ta. Rochdale khan first half-ah harsatna nasat min siak a, amaherawhchu first half-a kan goal khat hmang khan second half-ah insiamṭhatna hun min siam sak a ni. Kartawpah club lian zawk an chak lo a, barakhaih result kan thlen tir ve lo kha kan lawm a ni," tiin a sawi.

Stoke boss chuan sawi chhunzawmin, "Bojan-a inhliam dan tak kha kan la hrechiang bik lo. Scan a neih zawh hunah result duhawm tak kan hriat ka beisei. Kan club-a a rawn kal hnuah goal pawimawh tak tak min khung sak a, Rochdale laka a goal kha training-naah kan lo hmu fo tawh a ni," tiin a sawi.