Australian Open Nadal an dâl; Murray leh Maria chak zel

Australian Open a ngaihnawm zel - rin loh taka Roger Federer a tlak hnuah Rafael Nadal-a'n a hnung a zui ve leh ta. Melbourne Park-ahCzech mi Tomas Berdych hmaah a tlawm. Andy Murray chuan Australian rawlthar thawm na zet mai Nick Kyrgios a hneh a, semi final a lut. Hmeichhe lamah Maria Sharapova a kal zel a, canadian Eugenie Bouchard chu awlsam takin 6-3 6-2 in a tlawm.

Nadal dâltu Berdych

Vawi 17 an inhmachhawn tawha vawi khat mah hnehna la chang ve lo Tomas Berdych-a'n Rafael Nadal laka a record duhawm lo a thai bo a, a vawi khatna atan hnehna changin Australian Open aṭangin mipui rin zawk Nadal chu nimina inkhelah a hnawtchhuak. Grand Slam-a vawi 14 champion tawh Nadal hnawtchhuak tur hian Tomas Berdych hian darkar hnih leh minute 13 a mamawh a, a tawpah 6-2 6-0 7-6 (7-5) in hnehna a chang ta a ni.

Nikum aṭanga Andy Murray-a coach hlui Dani Vallverdu-a coach-a hmangtu Tomas Berdych hian semi-final ah Andy Murray a tum ang. Berdych hi Jo-Wilfried Tsonga tih lohah chuan tennis khawvela 'Big four' tia an hminglem an vuahsak - Roger Federer, Nadal, Novak Djokovic leh Murray-te Grand Slam-a hneh vek thei awm chhun a ni.

Eng nge an sawi?

Tomas Berdych chuan, "Nuam ka ti takzet a ni. Engkim kan duan sa anga a thleng vek mai a ka tan chuan a fuh takzet a, khelh ka tum dan ang takin ka khel thei. Mahse, game tawp hma kha chu thil dang ka ngaihtuah thei lo," a ti.

Grand Slam-a Nadal a hneh ta mai chu a lawm a, "Kan khel zo chiah kha chu ka hlim em em ringawt mai a, ka chak hi naktuk zing thleng ka lawm ang a, chumi hnuah chuan ka match khelh leh tur atan ka inpuahchah nghal ang. Champion tur chuan kawng thui tak zawh tur a la awm a, chumi tur chuan ka inrin reng a ngai a ni, " a ti a, champion a tum ngam.

Chaklo zawk Nadal chuan, "Ka 'day' a ni lo ve hrim hrim a ni ber e. Grand Slam quarter final-a i tumpui tana awlsam tur zawng hlira i khelh chuan i tan chak ngaihna a awm lo ang, ka game tir lam khan chutiang chuan ka khel a ni," a ti.

Nadal hian hliam vangin kum 2014 chawhnu lam khan match sarih chiah a khel a, French Open final-a Djokovic a hneh hnua top ten player a tum leh hmasak ber a ni. He mi chungchang hi sawiin Nadal chuan, "Ka nih tur ang ni lo chungin ka khel a, quarter final ka lut thei tho a, result chhe tak a ni hran lo e. Thla sarih chhunga match nga chauh khel chungin Australian Open-ah hian ka lo kal a ni," tiin a sawi.

Murray a kal zel

Andy Murray chuan khawtual tlangval Kyrgios chu harsa lo takin a hneh a; kum 27 mi British player hian Australian teeneger hi 6-3 7-6 (7-5) 6-3 in a hneh. Murray hian semi final-ah Tomas Berdych a tum dawn a, hei hi Australian Open-a semi final vawi nga a khelhna tur a ni a, Grand Slam-a ṭum 15 semi final a luhna a ni bawk.

Kum 19 mi Kyrgios hi beisei loh taka quarter final lut a ni a, set khatnaah a talbuai a, set hnihnaah khel ṭha ve deuh mah se Murray-a service a la hleithei lo a, set thumnaah phei chuan Murray hi a chak awlsam hle a ni.

Sharapova khing zo an awm lo

Russian nula Maria Sharapova khing zo an la awm lo a, quarter final-a Eugenie Bouchard hneh tur hian darkar khat leh minute 18 bak a mamawh lo a ni. 2008 champion Sharapova hian semi-final-ah a hnampui Ekaterina Makarova a hmachhawn dawn a, seeded 10 na Makarova hian 6-4,6-0 in Simona Halep a hneh thung.

Inkhelh zawhah Grand slam title vawi nga la tawhtu Sharapova chuan, "Inkhel bul ka ṭan ṭha a, khatiang taka khelh tluan kha ka tum a, tihsual ka nei vak loin ka hria, " a ti. A hneh tak kum 20 mi Eugenie Bouchard chungchang sawi chhunzawmin, "Amah a inringtawk em em mai a, kha tak kha tihbuai tumin theihtawp ka chhuah a, ka hlawhtlingin ka hria, " a ti.

Nikuma semi-finalist Bouchard chuan, "Ka inkhelh chhung zawng khan ka buai a, ka ke a na bawk nen ka khelh duh dan angin ka khel lo a ni," a ti.