Tunge MPL Playoff inpet tling dawn?

Mizoram Premier League qualifier khelh mekah Luangmual FC chuan khelh khat hmabak nei chungin MPL-4 an inpet kai tawh. MPL Qualifier-a pahnihna hian MPL Playoff an la khel thei a, team dang pathumin pahnihna dinhmun an inchuh dawn.

Zotlang FC, Lunglei (1 point) leh Upper Republic FC (3 points) chu chawhma dar 11:00-ah an inkhel ang a, Luang­mual FC (6 points) leh Electric FC (1 point) chu chawhnu dar 2:00-ah Lammualah an inkhel ang.

MPL Playoff hi February chawlhkar khatna leh chawlhkar hnihnaah khelh tur a ni a; MPL Qualifier-a pahnihna leh MPL-3 lama pasarihna Reitlang FC-te'n an khel ang.

Playoff luh theih dan

Upper Republic tan Playoff khel phak turin chak a tawk. Zotlang FC an hneh theih chuan point ruk an hmu ang a, inkhel dangin he result hi a tibuai phak tawh lo. Hetihlai hian Upper Republic hi chakin Luangmual FC hi chak lo ta se, point ruk ve ve an hmu ang a, Luangmual FC hi head to head-a an san zawk avangin lehpelh theih an ni tawh lo.

Zotlang FC tan chak ngei ngei a ngai a, Upper Republic an hneh theih chuan point li an hmu ang a; chawhnu lamah Electric FC-in Luangmual FC laka point thum an hmuh zawh loh chuan Zotlang FC hian Playoff an khel thei ang.

Electric FC tan Luang­mual FC hneh ngei ngei a ngai a, chu pawh chu Upper Republic lamin point thum an lo hmuh tawh si chuan awmzia a nei lo ang. Electric FC-in Luangmual an hneh a, inkhel hmasaa Zotlang FC an chak bawka, Zotlang FC aia a tawpa an goal difference a san zawk chuan Electric FC hian Playoff an la khel thei ang.