League Cup semi final - Sheffield khemualah Spurs

Kartawp khan FA Cup fourth round aṭangin Tottenham Hotspur-in Leicester City hneh loin an tla a, he result avang hian League Cup (Capital One Cup) semifinal second leg-ah Spurs-in pressure an ngah hle.

Zanin dar 1:15 PM-ah Sheffield United-in an khelmual Bramall Lane-ah Tottenham an mikhual dawn a, first leg-ah Premier League club hi Andros Townsend penalty hmangin 1-0 in an chak.

FA Cup nghawng

Premier League-a champion rinkai Chelsea leh Manchester City te'n division hniam zawk hneh loin FA Cup aṭangin an tla a, pawisa hmang hnem Manchester United-in goal awm loin Cambridge United an draw bawk.

FA Cup fourth round result mak danglam tak hian club tenau zawkte phurna a pe a, inrintawkna thar a siam sak.

Sheffield United manager Nigel Clough chuan, "Cambridge United-in an khelmuala Manchester United an draw theih avangin Bradford player-te phurna nasa tak a pe a. Zirtawpni zan inkhel result avang khan Inrinni zanah Chelsea hnehin final round an lut. Bradford leh Cambridge United te result hlawhchhuah khan nasa takin kan team minti phur a ni," tiin a sawi.

Sheffield United boss hian fimkhur ṭulzia erawh a hre chiang. Clough chuan, "Spurs hian an chetsualna hi insiamṭhat nan hman an tum ang, an fimkhur dawn. Kartawp khan Spurs khan player pakua zet an chawlh tir a, chu chuan League Cup semifinal an ngaih pawimawhzia a tilang. Final lut turin minute 90 chiah an mamawh a, an thutlukna hi a mak lo," tiin a sawi.

Clough chuan beisei an la neih thu sawi chhunzawmin, "Mi tam tak chuan first leg zawh khan Tottenham hi final lut chiang turah an ngai. Amaherawhchu goal khat chiah an khung avangin beiseina sang tak kan la nei a ni. A harsa dawn tih kan hria a, chutihrualin final lut turin theihna kan nei tih kan chiang," tiin a sawi.

Insiamṭhat hun

Tottenham tana semi final-a goal khungtu Townsend chuan, "Sheffield Wednesday nena kan inkhel tur hi a pawimawh takzet a, club ṭantute hlim tir leh hi kan beisei tlat a ni. FA Cup-a kan chak loh theihngilhin kan khel dawn. Tun season-ah hun tawp lamah vawi tam tak kan comeback a, chuvangin Leicester kan hneh loh avang khan kan buai phah lo ang," tiin a sawi.

Spurs hian 2009 League Cup finala Manchester United an hneh loh hnu khan Wembley Stadium an la thleng leh lo a, tun hi an tan hun ṭha a ni.