Arsenal hmachhawn tur Boro

FA Cup champion lai Arsenal-in fifth round-ah an khelmual Emirates Stadium-ah an khel thei dawn a, an khingpui tur chu Manchester City hnehtu Middlesbrough an ni. Fifth round hi ruahman lawk dan chuan February 14-15 a khelh tur a ni.

Aitor Karanka team-te hian Etihad Stadium-ah goal venhim an thiam tih leh goal an khung thei tin an lantir tawh. Boro hi Championship-ah pahnihna an ni mek a, hmahruaitu Bournemouth nen an inkarah point khat chiah a awm. Chutihrualin Arsenal hian an theihna anga an khelh chuan Boro hi chu harsatna nei loa hneh tur an ni.

Manchester United an vannei zel a, Old Trafford-a Cambridge an hneh theih chuan Preston North End leh Sheffield United chak zawk an hmachhawn dawn.

Liverpool-in Anfield-ah Bolton Wanderers lakah goal an khung thei lo a, replay-ah Bolton an hneh chuan Crystal Palace an hmachhawn ang. Crystal Palace hi coach thar Alan Pardew hnuaia harhtharna chang mek an ni a, Southampton hnehtu an ni.