PSG-in Januzaj an duh, United-in hnar Old Trafford-ah Van Persie a nghet lo?

Manchester United-a khel phak meuh lo, kum 19 mi Adnan Januzaj chu Paris Saint Germain chuan lei tumin an dawr a, United-in an phal lo. Hetihlai hian Man United striker Robin van Persie chuan Old Trafford-ah a châm rei dawn leh dawn loh a sawi thei lo.

PSG-in Januzaj duh

Season hmasaa United tana chanchin lawmawm awm chhun chu Januzaj-a che ṭha kha niin an sawi. Belgian rawlthar hi David Moyes-a hnuaiah a khel ṭha a, tun season-a United star ni thei turah an ngai. Louis van Gaal a lo lut a, Januzaj hi vawi 13 chiah a la inlan a, chu pawh chu a khel rei lo ṭhin hle.

United boss hian Januzaj hi khelhtir lo mah se hralh a la phal lo a, tun transfer tawp hunah a hmalam hun tifel tura indawr an tum chauh. United hian Januzaj leh a agent-te titipui a, tun season tawp hma chu chhuahtir loa kawl phawt an tum.

Hetihlai hian PSG chuan Januzaj hi lei an lo tum der tawh a, hei hi Januzaj agent Dirk de Vriese chuan a sawi chhuak. Januzaj-a agent chuan, "Tun thlasik transfer chhung hian PSG lamin lakluh an duh thu hi an rawn sawi tawh a, Manchester United hi an dawr tawh. Louis van Gaal chuan tun thlasiklai hian Januzaj hi a chhuak dawn lo tih a sawi chiang a, loan-a chhuahtir pawh a phal lo," a ti.

Januzaj-a agent sawi zel danin LVG hian he player hi a la dah pawimawh a, "Coach hian a player pawimawh a nih thu a sawi a, hei hi thutlukna tawp a nih hmel a, a thu hi a sawh sawn ka ring lo. Chuvangin Januzaj hi a chhuah ka ring lo," tiin a sawi.

RVP a chiang lo

Arsenal captain hlui hian kum 2016 thleng khel turin United-ah contract a la nei a, a contract pawhsei chu sawi loh a contract hi a hmang tluan dawn nge dawn lo a sawi chiang duh lo.

Dutch striker chuan, "Ka thu a ni lo. Tunah hi chuan thla 18 chhung khel turin contract ka la nei. Ka hmalam hun hi ka thlir thiam lo a, eng thil nge lo thleng dawn ka hre lo a, nghak phawt ila eng thil nge thleng kan hria ang chu," tiin a sawi.

United chuan an striker hi contract thar ziahpui an duh a, chuti a nih loh chuan kum 2016-ah a free-in a chhuak thei dawn tih an hria. Hetihlai hian RVP chuan a hmalam hun hi Old Trafford-a hman zawh a tum thu a la sawi duh lo a, a contract neih sa pawh a hmang zo dawn tih a intiam lo.

Netherlands international striker hian an ram lama an manager hlui Louis van Gaal chu a rintawk thu a sawi a, season hmasaa an sawisel rawn David Moyes aia record la nei ropui bik lo LVG hi mi tam tak chuan an sawisel a, RVP chuan a ṭan tlat.

Netherlands team-a LVG hnuaia khel ṭhin striker chuan, "Kum hnih chuang kan inzui tawh a, ka ringtawk hle a ni. A hnathawh dan ka hriat chian avangin a chungah rinna ka nghat ngam. Tunah hian inkhelh apianga chak vek kan duh a, kan chak dan pawh mawi taka chak kan duh. Hei hi thil harsa tak a ni a; nimahsela zawi zawiin kan hnaih hret hret zel a, kan nghah peih a ngai a, kan theihna zawng zawng kan pek a ṭul a ni," tiin a sawi.