Australian Open Semi Final ah Djokovic vs Wawrinka Williams unau lawm a kim lo

Australian Open hmawr an bawk hnai a, a result a ngaihnawm tawlh tawlh. Novak Djokovic-a'n a theihna a pholang zel a, quarter final ah Milos Raonic 7-6 (7-5), 6-4, 6-2 in a tlawm. Champion lai Stan Wawrinka a kal zel a, Japanese player Kei Nishikori tlawmin Australian Open title humhim turin vawi hnih chiah chak a mamawh ta.

Djokovic leh Warwinka-te hi tun hnaiah a kum zawnin semi final-ah an intum tawh a, a ṭum thumna atan an inkhel leh dawn a ni.

Williams unau erawh an dinhmun a inang ta lo, kum 19 mi Madison Keys hma-ah Venus Williams a tlawm laiin a nau zawk Serena Williams erawh a chak zel a, semi final lut turin Dominika Cibulkova chu 6-2,6-2 in a tlawm a ni.

Djokovic a kal zel

World no.1 Djokovic-a'n chhan awm loin world no.1 a ni lo tih a tilang zel a, quarter final-ah world no 8 Milos Raonic hneh turin darkar khat leh minute 55 bak a mamawh lo a, Rod laver Arena-a inkhelah hian 7-6 (7-5), 6-4, 6-2 in Raonic hi a tlawm a ni.

Djokovic chuan, "Mahni inrintawkna nasa tak nen he hmunah hian ka lo kal a, hetiang tak hian khelh zel ka tum," a ti. Djokovic hian semi-final ah Japanese Kei Nishikori hnehtu Stan Wawrinka a tum dawn a, anni pahnih hi 2013 leh 2014 Australian Open-ah an lo intum tawh.

He an inkhelh tur hi thlirlawkin, a vawi 25 nana Grand slam semi final khel tur Djokovic chuan, "2013 leh 2014 Australian Open-ah khan set nga kan khel a, khatiang inkhel hautak hmachhawn leh tur khan ka inpeih tawh a ni. Ka khe in hma ka sawn a, zanin kan inkhel hautak tak mai pawh khan mahni inrintawkna nei turin min pui a ni, " a ti.

Djokovic hmachhawn tur Wawrinka

World no. 4 Stan Wawrinka chuan nikuma a lo champion tawhna Australian Open-ah a beiseina a chhawm nung zel a, Rod Laver Arena-ah seeded 5 Kei Nishikori chu 6-3 6-4 7-6 (8/6) in a tlawm.

Wawrinka leh Nishikori-te intum hnuhnung ber chu nikum US Open quarter final kha a ni a, Nishikori hmaah Wawrinka a tlawm tawh. Mahse, tun ṭumah erawh Wawrinka hun a inher chhuak a, darkar hnih leh minute li chhungin world no. 5 Nishikori hi a tlawm a ni.

Inkhelh zawhah chak zawk Wawrinka chuan, "Game awlsam lo tak a ni. A rawn hlap let ṭha thei hle a, a tirah phei kha chuan inveng chungin ka khel a, mahse, a tawpah ka chak avangin ka lawm a ni," a ti.

A hmabak inkhelh awm leh tur chu thlirlawkin Australian Open-a champion lai chuan, "Ka title humhim turin ka lo kal lo...Grand Slam thar khel turin ka rawn kal zawk a ni. Game awlsam a awm dawn lo a, a harsa em em vek dawn a ni, mahse ka khelh ṭhat vanga semi-final ka khel leh thei tur hi ka hlim a ni," a ti.

Chak lo zawk Nishikori chuan Wawrinka a lawmpui thiam hle a, "A khel ṭhat vangin lawmpui tur ka ni. Game ṭha tak a khel a ni," tiin a fak.

Venus êng a chuai

Kum 19 chauh a upa a ni a, Australian Open ah semi-final a luh a inring kher lo mai thei, seeded pawh a ni pha lo miau a! Mahse, Madison Keys-i'n Australian Open-ah a theihna a pholang a, darkar khat leh minute 54 chhungin 6-3 4-6 6-4 in Grand Slam-a vawi sarih champion tawh Venus Williams a tlawm.

Inkhelh lai hian Keys hi nikum Wimbledon-a a buaina a ke hliam bawkin a tibuai a, set hnihna an khelh laiin 'medical timeout' a la hial. Mahse, hei vang hian American nula Madison Keys hi a buai mai lo a, ṭha taka khelh chhunzawm lehin Venus hi a hneh ta a ni.

Inkhelh zawhah a hliam chungchang sawiin Keys chuan, "Wimbledon kha min hriat chhuahtir a... ka hlauthawng hman khawp mai, mahse ka game a tihbuai hmain ṭha takin ka khel leh thei a, ka lawm hle a ni," a ti a, "Semi-final khelh hi ka chak em em chu a ni," a ti a, Australian Open semi final a khel tur chu a phur hle.

Serena dang thei an awm lo

A laizawnnu tlawm mah se Serena Williams erawh tlawm a tum lo a, Asutralian Open semi-final ah a unaunu tlawmtu Madison Keys tum turin hnehna a chang.

Seeded no.1 leh World no.1 ni bawk Serena hian nikum Australian Open finalist leh seeded 11-na Dominika Cibulkova chu awlsam takin 6-2 6-2 in minute 65 chhung lekin a hneh.

Kum 33 mi Serena hian Australian Open semi-final vawi nga lut tawhin, hengahte hian a champion chhunzawm vek a ni.

Grand slam title 18 la tawh Serena hi damlohnain a tlakbuak a, mahse, hei hian a tibuai lo, "Ni eng emaw chhung kha chu nuamsam lo takin ka awm reng a, mahse, tunah chuan ka zia tawh e, ka ṭha chho zel turah beisei ila...he tournament a ka chak zel thei hian min tihlim a ni," a ti.

Chakta lo zawk Slovakian nula Dominika Cibulkova chuan chhuanlam siam a tum lo a,"Kan inkhelah khan thawk lakna hun min siamsak lo hrim hrim a ni," a ti a, a hneh loh Serena a fak hle.