West Ham chungah Senegal coach lawm lo

African Cup of Nations khelh mek a ni a, tun thla tir khan Senegal forward Diafra Sakho chu inhliam vangin a inhnukdawk a, ram tan a inlan ve lo.

Amaherawhchu, Pathian­ni khan Sakho hi West Ham tan FA Cup-ah inlan a, goal awmchhun a khung zui. Senegal coach Alain Giresse a lungawi lo takzet.

Giresse chuan, "Kar ruk chhung thlawhna i chuan theih loh a, football i khelh leh thut si chuan England-ah damdawi ṭha tak a awm a ni ngei ang. Sakho a inkhel tih ka hriat khan mak ka ti hle a ni," tiin a sawi.

January 17 aṭanga ṭan African Cup-ah Sakho hi Senegal tana khel turin koh a ni a, inhliam vangin West Ham forward hian chhuanlam a siam a. Senegal coach-in a dinhmun dik tak enfiah duh mah se club lamin thlawhtheihnaa a chuan theih loh thu hrilh a ni.

Senegal boss chuan, "West Ham hian thil ṭha lo tak an hnutchhiah a ni. Thlawhtheihna chuang thei si, inkhel thei tho hi chu a dik lo," tiin a lawm loh thu a sawi.

Sam Allardyce erawh a ṭanna ngaih a la ṭang reng. Hammers boss chuan, "Inrinni khan limo-a hruai a ngai a, training-naah a dinhmun kan enchhin. Pathianni khan bench-ah kan dah a, luhtir kan tum lo. Kan dinhmunin a zir tlat loh avangin kan luhtir ta a ni. Tihsual kan neih ka hre lo," tiin a sawi.