Vawiin inkhel tur thlirlawkna

Chawnpui VR4 vs Hollow BBSP

Chawnpui hian an match hmasa ber nimin ah khelin rinkai zawk Bethlehem an hneh thei a, an chhelo tih a hriat. An khelh ṭhat hi vawiin ah an chhunzawm thei ang em? Vawiina an inkhel tur thlir lawkin Chawnpui VR4 manager Laltlanmawia chuan Vanglaini palai zawhna a chhang a,"Bethlehem BC kan tum ṭuma kan khelh dan en kha chuan han huphurh em em hi kan nei hran lo. Chawnpui vengchhung mipui in min ṭawiawm ṭha a, kan phur khawp mai," a ti.

An match hmasa berah Hollow BBSP hian Tuikual South an hneh zo lo a, vawiinah erawh an chakloh hi chhunzawm an tum lo.Hollow BBSP Asst.Coach Jacob Liantluanga chuan Vanglaini palai zawhna chhangin an match hmasa bera Tuikual South an hneh loh a thlir kir a, "Match hmasa ber ah hi chuan khelh a harsa ṭhin a, kan second match ah chuan kan danglam tawh ang, kan match hmasa bera khel lo B.Malsawmkima'n a khel tawh dawn a, a ni hi kan innghahna tur a ni ang, " a ti a, an match hmasa bera point 14 hlawhchhuaktu Zonunsanga rokhawlhna vanga a tel theih dawn loh avangin an tawrh a rin thu a sawi bawk.

Tuikual South BC vs Bethlehem BC

He team pahnih intum tur hi mipui hmuh chak a ni. MSL khel tura mipui rinkai ni phak ve ve anni a, an match hmasa berah an chak ve ve. Match hnihna ah erawh he team pahnih dinhmun hi a in ang tawh lo.

Tuikual South hian nimin an match ah KK Basketball Club an hneh a, match hnih ah vawi hnih chak result an nei. An state pawn player te bawk he an chakna hian an ṭangkaipui a, vawiinah pawh an ṭangkaipui leh ang. Bethlehem BC hian an match hmasa berah KK Basketball club hneh mahse, an match hnihna ah rin kai loh zawk Chawnpui VR4 an hneh zo lo. Vawiinah team ṭha Tuikual South BC hneh tur chuan an ṭan a ngai khawp ang.