Lazio lakah Milan an tlawm nawn

Kartawp Serie A inkhelah AC Milan-in Lazio an hneh lo a, Thawhlehni zanah Coppa Italia quarterfinal-ah an inhmachhawn leh a, an hneh chuang lo.

San Siro-ah Lazio-in Lucas Biglia penalty hmangin 1-0 in an chak. Mikhual team midfielder Lorik Cana chu first half tawp hma hreta hnawhchhuah a ni a, second half minute 45 chhungin Milan-in player 10-a khel Lazio lamah goal an khung thei lo.

Lazio hian semifinal-ah Inter Milan emaw Napoli emaw chak zawk an hmachhawn ang.

Thawhlehni zan hian Milan-in inhliam vangin Nigel de Jong, Mattia De Sciglio, Daniele Bonera, Cristian Zapata, Giacomo Bonaventura leh Stephan El Shaarawy te chu an chhawr thei lo. An inkhelh hmasak ṭuma hnawhchhuah Philippe Mexes chu hrem vangin telh a ni lo.

Lazio-in Stefan de Vrij, Senad Lulic, Michael Ciani, Santiago Gentiletti, Edson Braafheid leh Pedro Luis Cavanda te an chhawr thei bik lo a, defence-ah Maurico-a'n a vawi khatna atan starting eleven a chang bawk.

Inkhel ṭan aṭanga minute 8-naah Ignazio Abate back pass sual chu Lazio forward Miroslav Klose tan goal khung ngeina tur ni mah se German forward hian goal zawnah a pet lo. Milan an chesual chhunzawm a, Jeremy Menez backpass sual zarah Keita Balde Diao-a'n keeper Christian Abbiati chauh a hmachhawn a, a ti goal bik lo.

Milan an insiamrem a, Alessio Cerci hmangin goal khungna an nei a, keeper Etrit Berisha-a'n a dang ṭha hle. Minute 38-naah Michelangelo Albertazzi-a'n handball vangin penalty a chawi a, Biglia-a'n penalty aṭang hian Lazio hmahruaina goal a khung.

First half tawp hma hretin Cana chuan Menez laka a foul vangin yellow card vawi hnihna a hmu a, referee thutlukna hi Lazio tan chuan hriatthiam a har khawp ang.

Asian Cup aṭanga tlak hnuah Milan tan Keisuke Honda a rawn kir a, a chance neih hmasak ber chu keeper Berisha-a'n a dan sak. Milan an chungnung zel a, Lazio defender Diego Novaretti-a'n ṭum hnih ṭha takin a dang leh bawk.

Giampaolo Pazzini a danglam bik lo, Milan tlar hma ang thoin goal khung theihna tur a hlah a. Lazio lamin first half-a hlahtu Keita hmangin an khung leh teuh viau bawk.

Pazzini aiah Inzaghi-a'n Liverpool aṭanga loan hmanga an lak Suso a luh tir a, inkhel result erawh a danglam phah lo. Lazio 1-0 in a chak

Inzaghi hnungah Milan

Result ṭha neih loh avangin Milan boss Pippo Inzaghi dinhmun a derthawng a. Amaherawhchu AC Milan hruaitute chuan Inzaghi hian a dinhmun chelh zel tur thu an sawi. Milan president Silvio Berlusconi leh CEO Adriano Galliani te'n telephone hmanga an inbiakna hnuah thutlukna hi an siam.

Inzaghi chuan, "Kan chak lo hi pawi ka ti takzet a, kan inkhelh dan thlir chuan chak lo tur kan ni lo. Chance ṭha tak tak kan hlah a, kan vanduai a ni. Kan theihna angin kan khel chhuak lo a, rim taka kan thawh chhunzawm a ṭul a ni," tiin a sawi.

Milan boss chuan sawi chhunzawmin, "Inkhelh banah kan ṭhianpain Sir Alex Ferguson-a'n League title la turin kum sarih a mamawh thu min hrilh. Ferguson nen hian ka inkhaikhin lo a, chutihrualin coach ropui Mancini pawhin harsatna a tawk ve tho. Result ṭha nei lo chunga hruaitute'n min rin tlat avangin ka lawm takzet a ni," a ti.