Real Madrid tlar hma an hriam ber

Switzerland-a Football Observatory te zirchianna aṭanga a lan danin tun season-ah Real Madrid tlar hmate chu goal khung kawngah an hriam ber.

Real Madrid hian goal attempt vawi 5.4 zelah goal an khung a; Premier League, La Liga, Germany's Bundesliga, Serie A leh Ligue 1 club 98 zingah Real tluk pha an awm lo.

Spanish club record ṭhat kawngah player manto te an thawh hlawk a. Cristiano Ronaldo chuan tun season-a league match 18 a khelh tawhah goal 28 a khung tawh a, khawvel player manto ber Gareth Bale-a'n goal 10 a khung tawh bawk.

Spanish club dang goal khung kawnga record nei ṭha te chu Valencia (5.7 attempts per goal), Atletico Madrid (6) leh Barcelona (6.6) te an ni.

Premier League-ah hmahruaitu Chelsea an hriam ber a, vawi sarih attempt-ah goal khat khung zel ang an ni a. London club hi club 98 zinga top 10-a lang pha awm chhun a ni.

Jose Mourinho hnuaiah Diego Costa-a'n league match 19 khelhah goal 17 a khung a, a hnuai chiaha awm chu goal riat khung tawh Eden Hazard a ni.

Chelsea-in League Cup semifinal-a an hneh tak Liverpool hi club 98 zingah 69-naah an awm. Tun season-ah goal khat an khung turin vawi 11.1 attempt an mamawh. Liverpool tan goal khung tam ber chu captain Steven Gerrard a ni a, goal nga khung tawh. Raheem Sterling-a'n league-ah goal li a khung tawh a, League Cup nen goal sarih a khung tawh.

Southampton leh Manchester United te chu 15-naah an awm dun a, vawi 7.6 attempt-ah goal khat an khung. West Ham leh Manchester City te intluk tawk chiah a, 29-naah awmin vawi 7.6 attempt-a goal khat khung ang an ni.

Arsenal-in goal khat khung turin vawi 9 attempt an mamawh a, 39-naah an awm. Premier League club zingah Tottenham (9.3), Everton (9.5) leh Crystal Palace (9.8) te top 50-ah a lang pha bawk.

Bundesliga club Hamburg-in goal khung turin 22.9 attempt an mamawh a, ani aia record chhia an awm lo.