Gerrard-a'n Wembley a thleng zo ta lo Chelsea-in extra time-ah Liverpool hneh

Wembley Stadium-ah Steven Gerrard-a thlahna inkhel ni pah fawma League Cup final khelh an tum tehreng nen, Liverpool chuan Chelsea an hneh ta si lo a, Stevie G chu champion nomawi nen an thlah dawn ta lo a ang hle.

Liverpool-in kum 2012 League Cup an champion hnua trophy hmasa ber lak an tumna an tihlawhtling zo lo a, Thawhleh zana extra time-a Branislav Ivanovic goal khung tuarin 0-1 in Stamford Bridge ah an tlawm. Andfield-a League Cup semi final first leg-ah Liverpool-in chak phû zawk chunga 1-1 a Chelsea an draw an tuar a, inkhelh hmasa nen belhkhawmin 2-1 in Chelsea an chak.

Cho leh cho!

Stamford Bridge-a inkhelah hian team pahnih an intum tawkin an inhlau lo tawn hle.

Chelsea lamah tun season a goal 17 khung tawh Diego Costa, Eden Hazard leh Oscar te'n tlar hma an mawi a; Liverpool lamah USA lama pêm tur captain Gerrard, Philippe Coutinho leh Englsih rawlthar duhawm Raheem Sterling-te'n bul an ṭan. Team pahnihte'n players an luhtir dan enin chak an tum tih a chiang.

Inkhel chu

Inkhel an ṭan a, minute 11 na lek-ah Diego Costa a langsar nghal, mahse tun ṭuma a lansarh dan erawh Emre Can a rah luih vang a ni thung. Referee in a hmu lo a, Costa a vannei.

Minute 22 na-ah Costa bawk a rawn lang leh a, Martin Skrtel nen ball inchuhin a tlu a, Skrtel hian a titlu ngei niin a lang a, mahse referee-in penalty a pe tlat lo. Minute 27-ah Gerrard a rawn lang a, Chelsea defence a ṭhiah hnuin Alberto Moreno ball a pe phei, Moreno hian angle chêp tak kar aṭangin a pet a, Chelsea keeper Thibaut Coutois tan dan harsa a ni lo.

Raheem sterling a rawn lang ve leh, box pawn hret aṭanga a pet chu khel ṭha Curtois chuan a ke in a lo dan sak leh a; minute 38-naah Oscar chuan Chelse tan a thun teuhn hle.

Second half an ṭan a, Costa bawk a langsar leh a, Skrtel-a keah a rap lui niin a lang a, referee in a hmu lo leh a, a vannei hle. Chelsea tan Hazard a khel ṭha a, defender hual karah mawi taka ball chawk kualin Liverpool goal-ah a pet a, mahse goal pawn lamah a kal tlat.

Hemi hnu hian Chelsea tana Costa pet ṭha tak chu tun hnaia sawisel hlawh Simon Mignolet chuan a lo dang.

Ivanovic a lo lang e

Team pahnih an in nawr tawn a, mahse hun pangngaiah goal an khung thei lo a, extra time khelh a ngai. Liverpool tan goal khung ngei ngei a ngai tawh, goal an khung loh chuan a chak lo zawkah an ṭang dawn. Capital One cup ah hian minute 90 chhung chu away goal rule hman a ni lo a, mahse extra time a an la in draw chuan khualmual a goal khung tam zawkin hnehna an chang ṭhin.

Liverpool-in an mamawh goal an khung thei lo a, Chelsea zawkin an khung tlat. Minute 94 na-ah Ivanovic a lo lang a, he Chelsea defender khel ṭha em em mai hian Willian-a free kick chu hnai set sawtah a tauh goal.

Liverpool in sût ngei tumin bei mah se an sût thei lo a, League Cup final luh an beiseina chu Chelsea-in an chhut chhiatsak ta.

Inkhel leh a behbawm

Emre Can leh Martin Skrtel-te rap luitu Diego Costa hnawhchhuah a ni lo kha a vannei a; minute 22 naah a penalty hlawh ngei tura ngaih pek a ni bik lo thung.

Liverpool tan Coutinho a khel ṭha tluan zak a, he Brazilian player hi a hmuhnawm hle. Balotelli erawh Liverpool tan a ṭangkai lo chhunzawm zel a, minute 70-naah Lazar Markovic a rawn thlak a, inkhel chhung zawngin a vang hle!

Chelsea-in thapui thawhin an player ṭha an luhtir a, chuti chung chuan tun hnaia hmasawn tak Liverpool nehn Stamford Bridge-ah an inhnehtawk hle a, Liverpool an insiamṭha zel tih a lang. Hei erawh a chiang - 'Tun season chu Chelsea hneh hi thil harsa a ni' tih hi

Eng nge an sawi?

Chelsea manager Jose Mou­rinho chuan, "Vawiina kan inkhelhpui Liverpool hi Liver­pool thar an ni. Khelh an harsa em em a, team ṭha tak vawi hnih kan bitum hnua chak zawk kan nih avangin ka hlim hle, " a ti a, an tumpui Liverpool a fak.

Mourinho chuan minute 50-naa Fabregas thlaktu Ramires fakin, "Ramires dik tak kan hmu leh ta, hei hi kan chak tih lohah chuan chanchin lawmawm dang a ni," a ti bawk.

Liverpool manager Brendan Rodgers a hnual mai lo a,"Kan khel ṭha hlein ka hria, vawih hnih kan inkhelh chhung khan kan khel ṭha zawk ve ve a ni. Goal khungna chance ṭha tak tak kan nei a, mahse, kan khung thei tlat si lo. Vawiinah hian ka lungawi lo hran lo, a chhan chu ka player-te khan an theihna zawng zawng an pe a ni," a ti a, an dinhmunah a lungawi thiam hle.

Liverpool boss chuan Chelsea striker Costa chu a chet dan avanga hnawhchhuah ngei tur niin a sawi a, Mourinho chuan a chhan tlat thung.