Costa Chanchin Chhia!

Diego Costa hi footballer ṭha tak, goal thun thei tak a ni. He Chelsea footballer hian chanchin dang a nei a, chu chu 'mi tihluih ching' tih a ni. Chelsea a zawm hnuah yellow card vawi riat a hmu tawh a, red card tur ṭum thum vel a pumpelh tawhah an ngai!

Brazil-a piang, Spain-a football-a eizawnga a awm rei avanga Spain khua leh tui nihna nei ta Costa hian Thawhleh zanah Liverpool player Emre Can leh Martin Skrtel-te a rap lui ngei niin a lang. Referee-in a hmu lo a, a la him a, FA lamin an ennawn a nih chuan hrem tawk thei dinhmunah a ding mek.

Costa chet dan hi Sky TV commentator-te chuan na takin an sawisel a, inkhelh banah Jose Mourinho chuan Costa hi chhanin TV commentator-te chu Chelsea sawi chhiatna tur zawngah an puh a, tute nge an nih pawh a hriat loh thu leh an hmel a lan apiangin TV a off hmiah ṭhin avangin commentator-te a hmelhriat loh thu a sawi chhuak hial!

SKY TV lama football expert Jamie Redknapp chuan Costa chu hnawh­chhuah ngei tur a nih thu a sawi a, hei hi chhângin Mourinho chuan, "He thusawitu hian Chelsea hi a lawm ve a, kei hi mimal takin min lawm a ni," tiin a tiel a, "Camera hmaah an ṭhu a, hlawh ṭha tak an nei a, manager ṭhenkhat aiin an hlawh ṭha zawk a, an duh duh an sawi thei. A sawitu an ni a, an sawi hi chu a dik zel ang," tiin ngeiawm takin a sawi zui bawk.

Costa hian season chanve a hmang mek a, yellow card pariat a hmu tawh. Chelsea kawr a hâk hnua a chanchin ṭha lo lam sawi hlawh zualte chu:

Costa v Tim Howard

August-a Chelsea-in Everton an hneh ṭumin Costa hian goal hnih a thun a, yellow card a hmu bawk. He inkhelah hian Seamus Coleman-a'n anmahni lamah a ti-goal palh a, Costa chuan Coleman hi a deusawh vak mai a, Tim Howard chuan Coleman hi chhanin an inbakkaih zui. He mi hma hian Costa hian yellow card a lo hmu tawh a, yellow card hmu leh ngei tura ngaihah a pumpelh a ni.

Costa v John O’Shea & Wes Brown

Sunderland nen an inkhelh ṭumin Costa hi John O'Shea leh Wes Brown-te lakah a che mawi lo a; nimahsela referee-in yellow card vawi khat chiah a hmuh.

November-a inkhelah hian goal a lut lo a, Costa hian amah vengtu John O’Shea chu ball tel loin a tlawh lui a, referee-in a hmu lo. He mi hnu hian Brown chu a kiuin a nghawk lui a, hetah hian red card ngei tura langah yellow card a hmu a, inkhelh banah sawi a hlawh zui hle.

Costa v Jordan Henderson

League Cup semi final first leg-ah Costa hi Jordan Henderson nen an intibuai. Liverpool midfielder hian freekick rang taka pet a tum a, hei hi Cesc Fabregas chuan a tibuai a, Henderson chuan Fabregas hi a nam sawn. Costa a rawn inrawlh vat a, Fabregas chu rawn chhanin Henderson hi a rawn din chilh nghal a; nimahsela Henderson hian, "Khelmual pawnah sawi fel ang," ti niawm takin dressing room lam a kawk a, an buai zui ta lo.

Zilh loh fa Costa

Spain-a a awmlai khan Costa hian buaina neuh neuh a lo nei nual tawh. A khawsak dan hi a chawr chhuahna fuh loh vangah mi tam takin an ngai a, kum 14 a nih hmaa football zirna nei mumal lo a nih vangah an puh - amah Costa pawhin a chet dan tam tak hi a naupanlaia zilhtu leh kaihruaitu a neih loh vang tih a pha lo.

Alteitco Madrid striker hlui chuan, "Ka football zirna chu kawgpui a ni mai. Kan inkhelh ve chuan kan insual deuh zel a, tu pawh kha ka sual ngam vek a ni ber mai. Kan indeusawh a, kan incho tawn a, kan khingpuite zahna pakhatmah ka nei lo. Mawi taka inkhelh zirtirtu ka nei lo a, kan inkhelh venaah chuan kan intilui a, kiua innghawk sawk sawkte hi ka hmu fo mai...," tiin a lo sawi daih tawh!