Sanga 'Chanmari' dal theitu Sawmtea 'Chawnpui'

Vawiin tlai dar 3:30 hian LZ Juice MPl11-ah match hniha vawi hnih chak thei Chanmari FC leh match hniha tlawm la nei lo Chawnpui FC te an inkhel dawn. Chanmari hi coach Lalsangzuala Hmar enkawl an ni a, Chawnpui hi I League-a hming chher thei B. Malsawmzuala enkawl a ni thung.

MPL10-ah khan Chanmari leh Chawnpui hi semifinal-ah an inhmachhawn a, Chanmari 3-0 in an chak. Tun ṭumah hian Chanmari hi buk rit leh zawk ni mah se Sawmtea hote hi a dal theitu zinga mi an ni.

Shabash Hallelujah

Chanmari FC hian MPL10 final an lut a, final-ah an vanduai. MPL11-ah erawh inlena ṭan hma aṭangin thawm an nei ring a, an jersey pawh India national team jersey pawh lo siam tawhtu SIX5SIX a ni.

Home Minister leh bialtu MLA K. Sapdanga hoin jersey tlangzarhna an nei a, MPL-a record nei ṭha ber coach Lalsangzuala Hmar an la lut a, Mizo player ṭha an la khawm bawk.

Khelmual pawnah ringawt Chanmari thawm a ring lo a, khelmual chhungah pawh an che ṭha nghal. Chanmari hian match hmasa bera FC Bethlehem 2-0 a an hneh hnuin MPL10 final rematch-ah Mizoram Police 1-0 in an hneh leh bawk.

Chanmari tan Lalrinchhana Tochhawngin captain hna a thawk a, goalkeeper Zothanmawia an neih bawk avangin MPL11-ah goal an la chhuah lo. Chanmarians tlarhnung a phui ṭha a, tlarhma lamah Khawpuimawia inhliam nghal mah se MS Dawngliana leh Lalnunzama te an la kawl.

An player-te hi Mizoram aiawh thei tura theihna nei vek an nih avangin inrintawkna an ngah a, Chanmari ṭantute pawhin nomawi an beisei ngam. MPL11 ṭantirh aṭangin Chanmari FC in ṭantu an nei ṭha a, RG Stadium-ah an hlapui 'Shabash Hallelujah' tih an rem leh thuai ang.

Chawnpui lam hi...

Chawnpui FC-in season liam taa semifinal thlenpuitu Lalrindika Hmar an chhawr thei tawh lo a, B. Malsawmzuala an chang thei thung. Sawmtea hian season liam ta khan I League-ah Aizawl FC chet ṭhatpuiin hming a chher a, kuminah a theihna tak tak fiahin a awm dawn.

Sawmtea hian a duh ang tak player la lut thei lo mah se Chawnpui hruaituten player ṭha an lakluh sak tho a, Chanmari laka point thum hlawh chhuak thei turin an ṭha tawk. Mahse, Chawnpui hian an theihna angin an la khel chhuak lo.

Chawnpui hian match hmasa berah Aizawl FC an chelh a, result chhia ni lo mah se naupang rual awmna SYS FC nen 1-1 thoin an inhnehtawk - hei erawh result ṭha a ni tawh lo. Sawmtea hote hian chak an mamawh a, chutihrualin Chanmari laka point khat hmuh hi result ṭha a ni thei ang.

Chawnpui hian hliam vangin Benri an chhawr thei dawn lo a, mah se Armed Veng South tlangval Lalnunsiama an neih tawh avangin an buai phah lo ang. Laltluangliana'n khelhna hmun duhin Chanmari aiin Chawnpui a thlang a, Mizoram team-a amah enkawltu Lalsangzuala Hmar hmaah a theihna lantir a tum dawn.

Tlarhma lamah Vanlalthanga, K. Lalrosanga, David Laltlansanga leh Jerry Lalchhanchhuaha te an awm a, MPL-a tawnhriat nei ṭha tak vek an ni. Chutihrualin Lunglei tlangval Lalthanzuala (TZ-a) tan MPL hmasa ber a ni thung a, HPC Cup-a top scorer TZ-a tan hming chher turin goal khung a pawimawh ber.