Mizoram football tana pawimawh Maenga a thi

Santosh Trophy hnuhnung bera Mizoram semifinal thlenpuitu manager K Lalenghluna (Maenga) chu heart attack vangin July 15, Thawhṭanni zan dar 10:00 khan a thi a, nimin khan Ramhlun North thlammualah vui liam a ni. Maenga hian a nupui leh a fanu pahnih a kalsan.

Maenga hi MFA Grassroots Secretary a ni a, Sairanga mipa leh hmeichhe naupang camp mekte ei tur zawng zawng buaipui vektu a ni. July 15, Thawhṭanni khan Maenga hian MFA Ground, Sairang Dintharah Mizoram sub junior team-te tlawhin fuihna hun an hmang a, an haw lam a motor khalh lai a chau thut a, a âwm a nâ a ti a, Ebenezer Hospital a luh hnuah zan dar 10-ah a chatthla fel.

Maenga hian football tan a hun pum a hmang tiin a sawi theih a, a tawpna pawh football tho a ni. MFA president Lalnghinglova Hmar chuan, "Mizoram football tana martar i ni ber e - Maeng!" tiin a ṭhianpa leh thawhpui hi a thlah.

Football hmangaihtu a nih avangin Maenga hian tualchhung football-ah sulhnu a ngah hle. Kum 2013 khan Ramhlun North FC muthlu tawh chu rawn kai thoin Mizoram Premier League thlengin a kaipui a, Mizoram team hmingin Captain NM Gupta Tournament, Silchar-ah pawh an inlan a ni.

Kum thum lai RNFC hi top flight football a khelhpui hnu hian Mizoram Football Association lamin a thawh hlawkzia hriain Executive Member atan an ruat a. Heta ṭang hi chuan club bil enkawl a rem tawh loh avangin Mizoram Football tan theihtawp a chhuah chhunzawm.

January 2019 khan Khelo India Youth Games 2019 Pune-a neihah Mizoram Under-17 Football Manager niin team a hruai a, September 22-27, 2019 chhung khan Agartala, Tripura-ah Santosh Trophy Qualifying Round khelin Mizoram Team a hruai a, Senior Team Manager niin Final Round khel turin a hruai kai bawk a ni. Hripui leng avangin Final Round hi khelh a ni ta lo hlauh a. Kum 2021 khan Santosh Trophy-a Mizoram Senior Team Manager atan ruat a ni leh bawk.

Kum 2022-ah phei chuan 2nd North East Olympics Meghalaya-a neihah Mizoram Football Team Manager ni lehin gold medal a lakpui a. 2023-24 Santosh Trophy-ah Mizoram Team a kaihruai leh bawk a, kum tam tak hnuah Semi Final a thlenpui a ni.

MFA tan mi pawimawh a ni a, tun season-ah pawh nihna a ngah hle. MFA Executive Committee Member; Secretary, Grassroot and Youth Development Committee; Secretary, Technical and Competition Committee leh MPL Board (2024) Asst. Secretary leh Committee Member, Registration Committee hna a chelh mek. MFA leh MPFA-in hlawhtling taka Charity match an buatsaih ṭum khan Organising Committee Secretary a ni bawk.

Mizoram Football tan theihtawp chhuahin MFA programme pawimawh hrang hrang- Naupang League, Reliance foundation Youth Sports, Reliance foundation Development League, MPL-ah te rinrawl leh thawh hlawk berte zinga mi a ni a. A hmun ruak zau tak hi MFA tan hnawh khat a harsa ang.

Santosh Trophy 2023-24-a Mizoram assistant manager Lalzarzova chuan, "Pu Maenga hi an chhungkaw tana pa nih a tlin ang chiahin team tan pa nih a tlin. Document pawimawh zawng zawng hi a hun takah a tifel a, team mamawh zawng zawng a buaipui a, player leh coaching staff tan chuan Manager duhthusam a ni. Ruihtheih thilah a fihlim a, ṭawngṭai leh bible chhiar a ngai pawimawh a, player ṭanpui ngai an awmin a mimal sumin a ṭanpui mai ṭhin. Player chauh ni loin coaching staff thlengin a bula awm nuam kan ti vek a, kan thu hriat hi mumang mai ni se kan ti hle," tiin a sawi.