Man United khelh dan tur a ni lo - Ten Hag

Manchester United chuan season thar atana friendly match hmasa berah Rosenborg an hmachhawn a, 1-0 in an hneh lo. Lerkendal Stadion-ah Norwegian club-in inkhel an thunun a, goal chance ṭhahnem tak an hlah hnuah Loah Emmanuel Jean Holm-a'n injury time-ah chakna goal a khung.

Erik Ten Hag-a'n bul ṭantu zingah Euro C'ship leh Copa America khel pha lo Marcus Rashford, Mason Mount, Casemiro leh Jonny Evans te hmang mah se Rosenborg an chungnung zawk. Norwegian club hi season liam ta khan an ram league sang ber Eliteserien-ah pariatna an ni.

Man United manager Ten hag chuan, "Pre Season ni mah se result hi a pawimawh. Man United kan nih chuan kan chak tur a ni. Kan chak thei lo a nih pawhin kan tlawm tur a ni lo a, mah se tun ṭumah erawh kan tlawm si. Chutihrualin friendly match a nih angin kan khelh dan a pawimawh a, kan khelh dan pawh Man United khelh dan tur a ni lo," tiin a sawi.

English club hian an striker hlui Ruud van Nistelrooy chu assisant manager turin an la lut a, Ten Hag chuan, "Manager tum sang tak nei a ni a, team leh mimal tan a ṭangkai ang. A bik takin attacking leh pressure pek danah a pawimawh dawn," tiin Ruud a fak.

Man United hian July 20, Inrinni hian Rangers an hmachhawn leh ang a, chumi zawhah Arsenal (July 28), Real Betis (Aug 1) leh Liverpool (Aug 4) te an hmachhawn dawn. Ten Hag-a hote hian season liam ta khan FA Cup nomawi an chawi avangin Community Shield an khel dawn a, August 10 hian Man City nen Wembley Stadium-ah an inhmachhawn ang.