England coach Southgate a bang ta

Euro final a zawna a hruai thleng chung pawha fak hlawh lo Gareth Southgate-a'n England coach hna a bansan a, Three Lions a enkawl chhunzawm tawh dawn lo - amah uitu karah Southgate-a ban vanga lawm zawk an tam hial mai thei.

Sir Alf Ramsey hnua England coach hlawhtling ber hian Euro khelh zawh takah khan Three Lions chu final a hruai thleng a, mahse, Spain lakah 2-1 a tlawmin nomawi an chawi ta lo - a tawpa kan thu hriat chu Southgate ban thu a ni.

Kum 53 mi manager chuan, "English mi ka nihna angin, England tana ka khel phak leh England ka enkawl thei hi chawimawina ropui tak a ni," a ti a, England coach hna a bansan.

Southgate hian kum riat zet England hi enkawlin, December 2024 thleng contract la nei mah se, Three Lions enkawl chhunzawm zel ai chuan ban a thlang ta zawk a ni.

A hun a thleng

Southgate hian England hi match 102 a kaihhruaiah vawi 61 hnehna a chanpui a, vawi 24 an khingpui inhnehtawkpuiin, vawi 17 an tlawm a, goal 213 zet khungin, an lamah goal 72 chiah a lut - a win ratio hi 59.8% a tling.

English coach chuan, "England team enkawl hi ka tan chuan engkima engkim a ni a, ka theihna zawng zawng ka hlan. Mahse, tunah chuan inthlak danglam a hun a, bung thar kai a ngai tawh a ni," a ti.

Southgate hian England kaihhruai hnem lamah Walter Winterbottom (139) leh Sir Alf Ramsey (113) chiah a phak lo a, fan-te beisei ang football hmuhnawm pho chhuak kher lo mah se, World Cup 1966-a England champion puitu Ramsey tih loha result nei ṭha ber a ni.

Middlesbrough coach hlui hian major tournament paliah England kaihruaiin, Euro 2020 leh Euro 2024-ah final a hruai thleng a, World Cup 2018-ah semifinal thlenpuiin, World Cup 2022-ah quarterfinal an thleng bawk.

Hmabak a êng

Euro 2024-ah England-in beisei ang game an khel chhuak lo a, group stage match hnuhnung bera Slovenia nen 0-0 a an inhnehtawk phei kha chuan fans tam takin khelmualah Southgate lam hawiin hnawmhnawk an vawm lut.

Mahse, Southgate a paukhauh tlat a, final a hruai thlen meuh chuan England fans tam zawkin a lam an ṭang leh tawh. Player a nih laia ram tana vawi 57 inlan thei Southgate chuan, "Germany-a kan squad kha en ila, player naupang, theihna nei sang tak tak an awm a, kan beisei nomawi min la chawipui ang.

"Khawvela fans ṭha ber kan nei a, min thlawpna kha ka tan chuan a hlu hle. England ṭantu ka ni a, ka ni reng ang. Player-ten thawnthu ngaihnawm zawk ziak a, an theihna ang ngeia kan hlimna min thlensak hun hi ka nghakhlel hle.

"England, engkim avang khan ka lawm e," a ti a, sel leh rel phurtu Southgate chuan England a mangṭha ta. Southgate hian kum 2016-a Three Lions a enkawl hmain England Under-21 chu kum thum chhung a enkawl hman bawk a, a lung a leng ve khawp ang.

A tawk ta e

Southgate chuan player leh a coaching staff-te lawmthu hrilh zuiin, assistant coach Steve Holland phei chu, "Coach talent nei ṭha ber zinga mi a ni," tiin a fak hial a, "English football hmasawn beiseiin kum 2011 khan England FA ka zawm," a ti bawk.

Football Association chief executive Mark Bullingham chuan Southgate thlaktu tur an zawn nghal thu sawiin, "A rang thei ang bera tihfel kan tum a, kan hman ta lo a nih pawhin a chinfelna tur lailawk chu kan nei," a ti.

England hian September 7-ah an match hmasa ber chu an khel lehnghal dawn a, UEFA Nations League-ah Republic of Ireland nen an inkhel ang. Bullingham chuan Southgate thlah nghalin, "Theih loh anga lang thil an ti a, kan hma hun atan kawng mumal tak min hnutchhiah bawk.

"England tana an hnathawh avangin Gareth leh Steve te kan chhuang em em a, kumkhuain an chungah kan lawm tawh ang - kum riat chhungin hriat reng tawh tur sulhnu ropui tak an hnutchhiah a ni," a ti a, Southgate leh a coaching staff-te a thlah.